Karnataka sorkar tharin fiahna paltlang Speaker atan Congress KR Ramesh Kumar thlang

Karnataka-a Janata Dal Secular (JDS) leh Congress ṭangrual sorkar, Chief Minister  HD Kumaraswamy kaihhruai chu nimin khan fiah a ni a, fiahna hi a paltlang a ni. 

JDS-Congress thawkdun hian MLA 117 a nei a, sorkar siam tura MLA neih ngai zat chu 112 a ni. Congress hian MLA 78 an nei a, JDS hian MLA 37 neiin independent MLA pahnihin an thlawp bawk a ni. 

Ṭangrual sorkar fiah a nih hma hian Congress MLA KR Ramesh Kumar chu Karnataka Assembly Speaker atan chuhtu awm loa thlan tlin a ni bawk. Eptu party BJP chuan Speaker atan hian S Suresh Kumar a nominate a, mahse inthlan dawnah a nomination an hnuhdawh leh tak avangin Kumar hi voice vote hmangin lungrual taka thlan a ni ta a ni. Kumar hi MLA ṭum ruk ni tawhin, HD Deve Gowda leh JH Patel-te kaihhruai sorkar hnuaiah Speaker ṭum hnih a lo ni tawh bawk. Siddaramaiah kaihhruai Congress sorkarah khan Health and Family Welfare minsiter a ni. 

Speaker atana thlan tlin a nih hnuah Kumar chuan House-a eptu hruaitu atan BJP legislature party leader BS Yeddyurappa chu pawm a nih thu a puang a, deputy opposition leader atan Govind Karjol ruat a ni bawk. Hemi hnu hian Speaker thar kaihhruaina hnuaiah JDS-Congress sorkar chu House-ah fiah a ni. 

Chief Minister H D Kumaraswamy chuan sorkar fiahna tur motion hi House-ah a pu lut a, hemi rual hian Congress hruaitu Ghulam Nabi Azad leh Mallikarjun M Kharge te chungah lawmthu a sawi nghal bawk. Sorkar fiahna tura vote lak a nih hma hian House aṭangin BJP MLA te chu an chhuak a, hemi hnu hian awlsam takin sorkar hian fiahna hi a paltlang zui ta a ni. 



Share this Post

Login to comment
No Comments