UP sorkar thar la lut

Uttar Pradesh-a BJP sorkar thar chu nimin khan lakluh a ni.

Lucknow-a Smriti Upvan park-a sorkar thar lakluh inkhawm hi Prime Minister Narendra Modi, BJP president Amit Shah, union minister leh BJP senior hruaitu eng emaw zatin an hmanpui a ni. 

Kar kalta Inrinni khan BJP MLA thlan tarte chuan party legislature leader atan BJP hruaitu thawm na tak leh a thusawi dan avanga sawisel tawk fo, Yogi Adiyanath an thlang a ni. 

Governor Ram Naik chuan nimin chawhnu khan Lucknow-ah Lok Sabha MP term nga lo ni tawh, Yogi Adiyanath hi UP chief minister thar atan a lalut a, a rual hian deputy chief minister pahnih - Keshava Prasad Maurya leh Dinesh Sharma-te pawh lakluh an ni a, minister atan mi 46 lakluh an ni bawk. Minister lakluh zingah hian hmeichhia paruk an tel. 

Yogi Adityanath :

-UP CM thar Adiyanath hi Hindu sakhu puithiam aṭanga politician-a inlet a ni.

- Kum 1972, June 5-ah Uttarakhand-a Rajput chhungkuaah a piang.

- A hming tak chu Ajay Singh Bisht a ni

- Mathematics subject-ah B.SC degree a nei

- Kum 26 a nih kum, 1998 khan Lok Sabha member atan thlan tlin a ni a, Lok Sabha member ni thei naupang ber a ni.

- School leh college eng emaw zat a enkawl tawh bakah, hospital pawh a enkawl tawh bawk. 

- Kum 21 a nihin Gorakhnath Math-a sakhaw puithiam, Mahant Avaidyanath-a zirtir-ah a awm. 

- Sakhaw puithiam, bang humhalh leh Hindu chanchin bik zirin training pek a ni. 

- Kum nga chhungin Mahant Avaidyanath-a zirtir duh ber a ni hman. 

- Kum 1996-ah politics-ah lutin, Mahant Avaidyanath-a election campaign-na enkawltu atan dah a ni

- 1998-a Avaidyanath-an politics a chawlhsan khan a aiawhtu atan Yogi hi a ruat a, Lok Sabha inthlanah nominee a ni zui a ni.

Yogi Adityanath hi Hindu kulmuk, Hindu sakhua chawisan duhtu a nih avangin sakhaw dangte chungchang pawh a sawi na thei hle. Mother Teresa pawh sawichhiain, Kristian-te'n India rama Kristian chawilar an tumna atan an a phiarrukna hmanrua a ni tiin, midang tana hna an thawhte chu chhuanlama hmanga Kristian sakhuaa inlehtirah a puh. Ayodhya-a Ram temple sak thlawptu lian tak a ni bawk a, sakhaw tlem zawkte 10% awm tlinna hmunah tualchhung buaina a chhuak zel niin a sawi a, muslim 35% an awm tlinnaah chuan sakhaw dangte tan hmun a awm ve ngai lo ti tein a lo sawi tawh bawk a ni. Kum 2015 khan Surya Namaskar ti ve lohte chu India ram chhuahsan mai turin a lo ti tawh bawk a, lemchan thiam Shah Rukh Khan chu Pakistan firfiak Hafiz Saeed nen a tehkhin bawk. 

Uttar Pradesh atana Yogi Adityanath thlan ni chu pawi an tih thu leh an duh loh thu Muslim te chuan an sawi a, muslim puithiam Maulana Mohammad Sajid Rashidi chuan sakhaw inkara inhuatna thlen thei thu sawi chhuak fotu chuan an state tan hmasawnna a thlen theih a rin loh thu a sawi a, BJP-in CM atana an thlang chhuak chu pawi a tih thu a sawi bawk. 

Congress party pawhin CM atan Adityanath thlan a nih chu fiamthu hlauhawm tak a ni tiin,  an state chu sakhaw tinte zalenna hmun a ni thei dawn lo a ni, an ti. Congress hruaitu Rizwan Arshad chuan Adityanath chu RSS thuthlung kenkawh tum a, zak mia loa sakhaw inthliarhranna sawi ṭhintu a ni, a ti. BJP chuan UP mipuite chungah fiamthu hlauhawm tak a thawh khum nia a ngaih thu a sawi.


Share this Post

Login to comment
No Comments