Uttarakhand sorkar tharah Congress aṭanga lut an tam

Uttarakhand-a BJP sorkar thar chu kar kalta Inrinni khan lak luh a ni a, minister atana lakluh mi pasarih zingah Congress party aṭanga lut mi pali an tel. 

State Governor Krishna Kant Paul chuan Inrinni tlai dar 3:00 khan Chief Minister atan Trivendra Singh Rawat chu rinawmna thu tiamtirin a la lut a, a rual hian a minister pasarihte pawh lakluh nghal an ni. 

Sorkar thar lakluh inkhawm hi Prime Minister Narendra Modi, Union minister Rajnath Singh, Thaawar Chand Gehlot leh VK Singh bakah BJP president Amit Shah-te'n an hmanpui a, BJP hruaitu eng emaw zat an tel bawk. 

CM thar hian lakluh a nih hnuah a minister tharte chu Secretariat-ah cabinet meeting hmasa ber a neihpui nghal a ni. 

Uttarkhand CM Trivendra Singh Rawat 

- Kum 1960 December thla khan sipai chhungkua aṭangin a lo piang a, a pa Pratap Singh Rawat chu Garhwal Rilfes-ah ṭang ṭhin. 

- Pauri Garhwal district-a Khaisarain khuaah lehkha a zir

- Kum 1979 ah  RSS a zawm a, 1985 khan Dehradun bialah pracharak (apostle)-ah dah a ni. He mi hnu hian BJP a zawm zui a ni.

- Journalism-ah post-graduation a zo. Kum 1970 khan kum nga chhung atan Uttarakhand organisational secretary atan ruat a ni.

- A vawi khatna atan 2002 khan state legislative assembly inthlanah Doiwala bial aṭangin thlan tlin a ni. 

- BC Khanduri kaihhruai sorkar-ah kum 2007 khan state cabinet minister atan dah a ni.

- 2014 by-election-ah Doiwala bialah a chuh a, mahse a chak zo lo. Kumin assembly inthlanah khan Doiwala bialah vek hian hneh taka thlan tlin leh a ni.

- Uttarakhand-a BJP chief minister panga-na a ni.


Share this Post

Login to comment
No Comments