Parliamentary panel-in a ṭul chuan PM ko thei

Parliamentary panel, Public Accounts Committee (PAC) chuan sorkar laipuiin pawisa a tih thih chungchanga thutlukna a siam dan leh, a thutlukna siamin nghawng a neih dante kimchang taka sawifiah turin Reserve Bank of India (RBI) governor a ko a, RBI governor thusawi danah panel hi a lungawi tawk lo a nih chuan Prime Minister Narendra Modi pawh sawifiah turin a ko leh thei.

Committee chuan Patel hnenah hian pawisa tih thih chungchanga zawhna hrang hrang chhan tur pawh a lo thawn tawh a, January 20-ah committee hmaa inlan turin a ko a ni. He hunah hian finance secretary Ashok Lavasa leh economic affairs secretary Shaktikanta Das-te pawh an inlan ang. 

PAC chairman leh Congress hruaitu, KV Thomas chuan questionnaire an thawn chu a chhanna an la hmuh loh thu a sawi a, mahse January 20-a meeting neih hmain chhanna te hi an dawn tur thu leh, an chhanna te chu meeting-ah an sawiho tur thu a sawi. 

Zawhna an pek chungchanga an chhan danah panel chu a lungawi tawk lo a nih chuan he thila inhnamhnawih, tu pawh committee chuan a ko thei tih Thomas chuan a sawi a, member-te an lungrual a nih chuan PM pawh an koh theih thu a sawi. 

Thomas chuan nikum November 8-a pawisa note tih thih a nih hnu khan PM Modi pawh a hmuh tawh thu a sawi a, PM chuan ni 50 hnuah boruak pawh a pangngai tawh dawn niin a sawi a, mahse a sawi ang chu a la ni lo a ni, a ti. Mipuite buaina chu a la ziaawm loh avangin PAC chuan top official-te koh chu a rel ta a ni, a ti.


Share this Post

Login to comment
No Comments