Parliament Monsoon session July 21 ah ṭan dawn

Sorkar laipui chuan Parliament Monsoon session chu July 21 aṭanga August 21 chhunga neih tur a nih thu Nilaini khan an puang. Session neih tur hi ruahman tawh sa aiin ruahman tharah hian kar khatin a rei zawk dawn ta a ni.

Parliamentary affairs minister Kiren Rijiju chuan sorkar proposal siamte chu president Droupadi Murmu pawhin a pawmpui vek tawh niin a sawi. Rijiju hian X kaltlanga post a siamah, August thla hian Independence Day lawm a nih dawn avangin August 13 leh 14-ah session ṭhutkhawm a awm loh tur thu a tarlang tel bawk.

Ruahmanna siam hmasak zawkah khan session hi August 12 thlenga neih tura tih ni mah se thlak danglamin kar khat chhung pawhsei a ni ta zawk a ni. Sorkar chuan session-ah hian Civil Liability for Nuclear Damage Act leh Atomic Energy Act te siam ṭhat bakah nuclear sector-a private player an tel theihna turte pawh hawn tel a tum nia sawi a ni. Hetih laiin eptu party lam pawhin Operation Sindoor chungchanga debate neih pawh an phut nasa hle a ni.