Pakistan sipaite'n laipuiin Poonch-a LoC area an kap

Pakistan sipaite chuan nimin khan Jammu and Kashmir Poonch district-a Line of Control (LoC)-ah inkahhai an bawh­chhia a, silai leh laipui hmangin India area leh post-te an kap niin defence thupuangtu chuan a sawi. 

India sipaite chuan Pakistan sipaite hi an kap let ve nghal niin a sawi bawk.

Defence thupuangtu chuan inkahna thlen hun hi nimin zinga dar 5:15 vel kha  anih thu sawiin Pakistan lam chuan inkahhai bawhchhiain silai pangngai hmang leh laipui hmangin Poonch district-a Mankote sector, LoC hrula awm chu an kap tih a sawi a, tun thla chhung ringawt hian Pakistan hian inkahhai puan ṭum 18 lai an bawhchhe tawh. 

Ningani pawh khan Sunder­bani sector, Rajouri district-a Pakistan laipui kah vangin  Junior Commissioned Officer (JCO) chu a lo hliam tawh bawk a, Oct 1 khan Pakistan inkahhai bawhchhiatah sipai pakhat chuan lo thih phah tawh bawkin hliamte pawh an awm a ni.



Share this Post

Login to comment
No Comments