Lockdown vangin hmun danga inhlawhfa Mi vaibelchhe khat chuang in lamah haw

Covid-19 hri leng vanga sorkar laipuiin ram puma inkharkhipna a puan avangin hmun danga inhlawhfaa awm, mi vaibelchhe li zinga 25% chuang, vaibelchhe 1.05 vel chu hna an thawh chhunzawm theih loh avangin anmahni in lamah an  haw tih sorkar chuan a sawi. 

Nimina Lok Sabha-a Labour and Employment Santosh Kumar Ganwar-a'n zawhna a chhannaah, lockdown avanga inhlawhfa, hna thawh chhunzawm thei loa mahni in lama haw hi Uttar Pradesh-ah tam berin mi nuai 32.50 an awm a, Bihar-ah nuai 15 an awm bawk, a ti. 

West Bengal-ah nuai 13.85 leh Rajasthan-ah nuai 13.08 an awm bawk a ni. 

Minister chuan in­hlawhfaa awmte hruai hawna turin Indian Railway chuan May 1 aṭang khan Shramik Special Trains ṭum 4,611 a tlantir a, mi nuai 63.07 te chu an in lamah phurh haw an ni, a ti. An zin kawngah hian ei tur leh tui thianghlimte a thlawna pek vek an ni tih a sawi bawk. 

Hemi rual hian an haw kawnga harsatna tawka thi awm leh awm loh chungchangah chhinchhiahna mumal erawh a awm loh thu a sawi. 

Ram chhunga khawpui tam takah hri leng vang in­kharkhipna thlahdul a nih chhoh leh tawh avangin inhlawhfaa awm tam tak pawh khawpui lamah an kir leh ṭan tawh a ni. 



Share this Post

Login to comment
No Comments