Khawvela mihausa ber India-ah a lo zin dawn; CAIT-in nawrh huaihawt an tum

American multinational techno­logy company, Amazon neitupa leh chief executive officer (CEO) nibawk Jeff Bezos chu January 15-16 chhunga New Delhi-a neih tur Amazon 'Sambhav event' hmang turin India-ah a rawn zin dawn.

Bezos hian prime minister Naren­dra Modi pawh inbiakna a neihpui dawn nia tarlan a ni a, industry lian hruaitute pawh inbiakna neihpui a tum bawk. Heng zingah hian Reliance neitupa Mukhesh Ambani pawh a tel niin an tarlang. 

Kum 2014 khan India hi a rawn tlawh tawh a, tunṭuma India a rawn tlawh leh tur hian boruak a nei lian hle a, Confederation of All India Traders (CAIT) chuan Bezos lokal lai hian nawrh lo huaihawt an tum ve bawk a ni.

CAIT-in duh lohna lantir an tum

CAIT chuan khawvela mihausa ber ni mek Jeff Bezos India rama a lo kal tur thu an hriat rual hian, India ram khawpui 300 velah duh lohna an lan tir dawn tih an puang nghal. 

"Jeff lo zin dawn avang hian duh lohna kan lan tir dawn a, mahse buaina siam zawnga nawrh huaihawt erawh kan tum lo. Delhi, Mumbai, Kolkata leh khawpui te zawkah te nawrh huaihawt kan tum a ni. Rampum huapa nawrh huaihawtnaah hian sumdawng mi maktaduai 70 vel kan tel rin a ni," tiin CAIT secretary general Praveen Khandelwal chuan a sawi. 

Amazon leh CAIT

Sumdawng intel khawm, CAIT-te hian kum 2015 -a India sorkar-a e-commerce company  (Amazon , Flipkart etc.)  an hekna thubuai kalzelah Bezos hian India hi a rawn tlawh pah dawn nia ngaihna a awm a, PM Modi inbiakna neihpui a tum chhan pawh hi a ni mai thei. CAIT hian Amazon leh e-commerce company dangte chu India Foreign Direct Investment (FDI) dan (norms) zawm loah an puh a ni.

Heng e-commerce company-te hian customer an hip theih nan an duh duhin online-a an thil zawrh te chu a man  an ti hniam emaw an discount ṭhin niin an puh a, thil zawrh tur leh zawrh dan chungchang an thununnate hian internet kaltlanga sumdawng ve lo te an vuak chhiat bakah; sumdawnna kawnga inelna a ti rualkhai lo niin  CAIT chuan an puh.

CAIT hmalakna avang hian nikum khan India sorkar chuan India ram e-commerce company, ramdang nena inzawmna neite chu FDI online market-a online-a an thil zawrhte chu list tarlang turin a ti a ni. He dan tharah hian online-a thil zuarte chuan customer hnenah anmahni thuin an thil neih an zuar emaw, stock (hralh bang) emawte chu an hralh thei tawh lo a ni. 



Share this Post

Login to comment
No Comments