Karnataka-a Isua lim siam tum BJP leh RSS-in an duh lo

Karnataka Kanakapura-a Kapa­libetta hmuna feet 114 a sang Isua Krista lim siam tum Bharatiya Janata Party leh RSS-te chuan an duh lo hle a, nimin khan duh lohna an lantir.

BJP hian nimina duh lohna an lantir hi Kanakapura Chalo’ protest tiin a hming an vuah a, Isua lim an siamna tur ram chu dan loa neih a ni tih sawiin, milim siamna tur sum pawh chu khawi aṭanga nei nge an ni tih an zawt bawk.

Kanakapura Congress MLA DK Shivakumar chuan a constituency mipuite aiawha ding a nih angin milim chu siam an tum thu a sawi.

"Ka thutlukna a ni lo a, Kristian community-te duhdan a ni zawk a, MLA ka nih angin ka ṭanpui an ngai a ni. Ram pawh hi dan ang thlapa pek an ni," tia sawiin RSS leh BJP chuan an duh a nih phawt chuan petition pawh an thehlut thei tih a sawi bawk.

BJP leh RSS pungkhawmte hian buaina an siam lohna turin police 1,000 vel venhimna kalpui turin an dah a ni. 

Krismas ni khan DK Shivakumar hian ram document hi milim siamtu turte hnenah a pe tawh a, milim hi granite hmanga siam tur a ni. Isua lim feet 114-a sangah hian feet 13 hi step a ni dawn a, step tur chin hi chu an buaipui ṭan tawh bawk. 



Share this Post

Login to comment
No Comments