Ayodhya chungchanga SC thutlukna ennawn turin ngen

Supreme Court-in Uttar Pradesh-a Ayodhya ram inchuh thubuai chungchanga thutlukna a siam chu ennawn turin Jamiat Ulema-e-Hind chuan nimin tlai khan ngenna a thehlut. Hei  hi SC thutlukna siam chungchanga Muslim party-in petition a thehluh hmasa ber a ni a, Muslim pawl dang pawhin thehluh an tum tih an sawi. 

Chief Justice of India hlui, Ranjan Gogoi kaihhruai judge panga awmna bench chuan November 9 khan hun rei tak tihkhawtlai tawh, Ayodhya-a Hindu leh Muslim-te ram inchuh thubuai hi a rel fel a ni. 

Supreme Court chuan Hindu leh Muslim-te ram inchuh, kum 1992-a Muslim mosque tihchhiat tak awmna hmun, ram acre 2.77-a zau chu Hindu Lord Ram temple sakna atan a pe a, hemi rual hian Ayodhya-ah mosque sakna tur ram acre 5-a zau chu Sunni Waqf Board hnena pe turin sorkar laipui a hriattir nghal bawk. 

Court thutlukna siam chungchangah Jamiat bakah, All India Muslim Personal Law Board (AIMPLB) chuan December 9 hma ngeiin petition thehluh an tum tih a sawi. Sunni Central Waqf Board  pawh Court chu a thutlukna ennawn tura ngenna thehluh an tum thu a sawi bawk a, court-in ram acre 5-a zau a pek chu an pawm dawn leh dawn loh an la ngaihtuah tur thu an sawi bawk a ni.



Share this Post

Login to comment
No Comments