India leh Nepal-in oil pipeline hawng

India leh Nepal chuan ramri kal­tlanga siam, Motihari-Amlekhjunj oil pipeline an hawng. He pipeline hi South Asia rama ramri kaltlanga pretroleum products link siam hmasa ber a ni. 

Motihari-Amlekhgunj oil pipeline hi prime minister Narendra Modi leh Nepal prime minister KP Sharma Oli-ten video link hmangin an hawng dun a ni. 

Nepal official chuan km 60-a thui, petroleum pipeline hi Bihar-a Motihari khua aṭangin diesel supply nan hman hmasak a ni awn tih a sawi. Hemi atan hian sorkar laipui chuan Nepal ram chinah venhimna pe turin Nepal Army nen pawh ruahmanna an siam tawh thu a sawi bawk. 

India aṭanga Nepal rama petroleum product supply hi tanker hmanga phurh ṭhin a ni. Mahse oil pipeline hi hman a nih chuan Nepal Oil Corporation (NOC) chuan kum khatah petroleum product phurh man cheng tluklehdingawn hnih vel chu a hum theih a beisei.

Oil pipeline siam hi kum 1996 khan rawt a ni tawh a, mahse kum 2014-a PM Modi-a'n Nepal a tlawh khan project hi tihfel a ni chauh a ni. Project thawk tur hian August, 2015 khan inremna siam a nia , mahse hemi kuma Nepal rama lirnghing na tak thleng avangin hna thawh tur pawh tihkhawtlai a ni a, nikum April thla aṭang khan thawh ṭan a ni thei ta chauh a ni.



Share this Post

Login to comment
No Comments