Iran Parliament-in UN nuclear watchdog, International Atomic Energy Agency (IAEA) thawhpuina tih tawpna tur resolution a pass chu Nilaini khan Iran president Masoud Pezeshkian chuan pawmin a hming a sign hnan a, dan thar hmang hian IAEA an thawhpuina an ti tawp ta.
Dan thar hnuaiah hian IAEA inspector-te chu Iran nuclear programme an endik phalsak an ni tawh dawn lo. Iran hian IAEA hi khawthlang ramte duhsak leh, Israel-in an rama nuclear hmunte a beihna pawh pawmpuiah a puh. IAEA in an rama nuclear site-te an endik dawn chuan Iran thuneitu sang, Supreme National Security Council phalna a neih phawt a ngai tawh dawn a ni.
Ram hrang hrangte chuan Iran thutlukna siam hi sawiselin, ngaihven zui ngai tak a ni tih an sawi. US Department of State thupuangtu, Tammy Bruce chuan Iran-in IAEA thawhpuina a ti tawp chu pawmzam mai chi a ni lo a, thawhpui chhunzawm leh nghal turin a ti. Germany foreign ministry thupuangtu, Martin Giese pawhin Iran thutlukna siam chuan thil hlauhthawnna nasa tak a siam a ni, tiin IAEA a thawhpui ngei a ngaih thu a sawi ve bawk.
June 13-a Israel-in Iran nuclear hmunte a beih hnu khan, Iran hian IAEA hi a sawisel fo a, Iran foreign minister Abbas Araghchi pawhin IAEA hotu Rafael Grossi chu an ramah an lo lawm tawh lo tih a sawi bawk. June 12-a IAEA board-in nuclear programme chungchangah Iran-in a thawhpui ṭha lo nia a sawi chu Israel-in an nuclear site beihna chhuanlamah a hmang niin an sawi. IAEA resolution siamah hian Grossi chu a mawhphurtuah an puh a ni. Iran-a ultra-conservative Kayhan chanchinbu chuan tun hnaiah Grossi hi Israel tana enthlatu a ni tiin, tih hlum a ni tur a ni tiin a lo chhuah tawh bawk a ni.
