China-ah Typhoon Lekima vangin mi 28 thi

China khawchhak lama Zhejiang province-ah thli na tak, Typhoon Lekima tleh vangin Inrinni khan lei a tawlh a, mi 28-an thi a, mi 20 an awmna chin hriat a la ni lo.

Zhejiang province-a Typhoon Lekima thlen hma hian mi maktaduai khat chu hmun him lamah thiar chhuah hman an ni. He chhiatna thlen hma hian Shanghai-ah pawh mi 2,53,000 chu hmun him lam pan pui an ni. Tourist ho tlawh zin em em Shanghai Disneyland pawh khar nghal a ni.

China Meteorological hotute chuan Typhoon Lekima tleh vangin Inrinni zing dar 1:45 vel khan Wenling city-a Yongjia-ah lei a tawlh a, mi 28-in nunna an chan thu an sawi. He khawpui hi Shanghai khawthlang lama awm a ni a, Shanghai aṭang km 300-a hlaa awm a ni. Zhejiang province-ah hian mi 20 an awmna chin hriat a nih loh thu an sawi bawk. 

Thli tleh vang hian thlawhtheihna 3,023 chu Shanghai, Hangzhou leh khawpui hrang hranga an thlawk tur tihtawp a ni. Thuneitute'n Shanghai-a Pudong International Airport-a high-speed magnetic levitation train pawh tlan rih lo turin an ti.

Typhoon Lekima hi hmarlam panin a kal a, China khawchhak lam tuipui awn zawngin a kal zel a ni.



Share this Post

Login to comment
No Comments