Jerusalem-ah Israel police leh Palestinian-te intibuai

Jerusalem-ah nimin khan Israel police leh Palestinian-te an intibuai a, mi eng emaw zatin hliam an tuar. 

Buaina chhuahna hmun hi Muslim leh Juda sakhaw hmun pawimawh awmna hmun a ni a, Muslim-ten Al-Aqsa mosque compound an ti a, Juda-ten Temple Mount an ti thung. 

Nimin kha Muslim Eid al-Adha holiday inṭan ni a ni a, Palestinian mi tam tak chu Al-Aqsa mosque-ah ṭawngṭai turin zing aṭangin an kalkhawm a ni. Nimin kha Juda-te hun pawimawh, B'av holiday a ni bawk a, hei vang hian buaina a chhuah venthawn thilah Israel police-te chuan Juda-te chu Temple Mount-a kal an khapsak.

Mahse police-te hian Juda mite hi luh tir an tum tho tia thuthang dik lo thehdarh a nih hnuah, Palestinian mi tam tak chu compound gate bulah pungkhawmin police-te chu an bei zui a ni. Police duty-te chu lungin an tawng a, hei vang hian police-te chuan pungkhawmte hnawhdarh nan hian stun grenade leh rubber-bullet te an hmang zui ve nghal bawk. 

Israel police-te chuan Juda-te chu Temple Mount an tlawh khapsak mah se, buaina a chhuah hnuah an thutlukna hi thlakin an kal an phalsak lehin, police-te venhimna hnuaiah hruai an ni. Mahse mosque-a ṭawngṭai tura kal muslim-te chuan ṭhutthleng leh hmanraw dangten an lo bei zui a, reilote hnuah Juda mite hi compound aṭang hian chhuah tir nghal an ni. 



Share this Post

Login to comment
No Comments