Nepal-in International agency puihna ngen

Nepal chuan tuilian vanga harsatna an tawh mekah international agency-te puihna a ngen. Ruahsur nasa vanga tuilian an tawrh mekah hian mi 67-in nunna an chan tawh a ni. 

Kar kal ta Ningani aṭang khan Nepal ramah hian ruah nasa takin a la sur chhunzawm reng a, district 25 te chuan tui­lian vangin harsatna an tawk mek a ni. Nepal khawpui Kathmandu bakah Kalanki, Kupondole, Kuleshwor leh Balkhu-te chu tuilian hian a chim nasa hle. 

Nepal police-te chuan ramchhung hmun hrang hrangah ruahsur nasa avanga tangkhang mi 1,445 an chhanchhuak tawh tih an sawi. 

Ruahsurin chhiatna a thlen dante sawihoin Pathianni khan World Health Organisation Nepal Office, United Nations Children’s Fund (UNICEF), United Nations Population Fund (UNFPA) leh agency dang aiawhte chuan Kathman­du-ah meeting an lo neih tawh bawk a ni. 

Ministry of Health and Population chuan Health Emer­gency Operation Centre dinin, tuilian leh leimin tuartu district hrang hrangte ṭanpuina hna an thawhnaah international agency-te chu an theih anga pui turin an ngen. 

International agency-te pawh hian ṭanpui ngaite puihna kawngah theihtawpa puih an inhuam thu an sawi. 



Share this Post

Login to comment
No Comments