Syrian raltlan 900 vel an let

Lebanon hmun hrang hrang- Beirut, Sidon, Tripoli, Nabatieh leh Bekaa-a Syrian raltlan cheng mi 900 vel chu nimin khan an ram lamah an kir leh tawh.

Lebanese Army kaihhruaina hnuaia Lebanon general security hmalaknain raltlante hi an haw a ni. Hetihlai hian United Nations High Commissioner for Refugees (UNHCR) chuan raltlan Syria-a haw lehte hi Syria-a an office chungchang hrilhhriatna booklet an lo sem ve bawk.

UNHRC chuan Lebanon-ah hian Syria raltlan 9,76,000 vel an khawsa tih a tarlang a, hetihlai hian Lebanon sorkar chuan Syrian raltlan maktaduai 1.5 vel an ramah an cheng niin an chhut ve thung. 

Syrian raltlan zinga 8,90,000-te chu an chenna hmun lama him taka an haw theihna turin Russia chuan ruahmanna a siam a, he a ruahmanna siam hi Lebanon thuneitute hnenah an pe tawh a ni.

Syria-ah hian tualchhung indona a chhuah reng avangin mipuite chu ram hrang hrangah an raltlan nasa hle. 

Kum 2011 aṭang khan sorkar leh sorkar paihthlak duha  helte inkarah indona a chhuak a ni. Mahse 2017 kum laihawl aṭang khan raltlante hi an ramah an kir leh ṭan tawh a, raltlan 2,60,000 vel chu an ramah hian an kir leh tawh nia rin a ni bawk. 



Share this Post

Login to comment
No Comments