Hong Kong hotuin extradition bill a thi tawh tih a sawi

Hong Kong chief executive Carrie Lam chuan danin thiam loh a chantir tawh main­land China a thawn phalsakna, extradition bill siam tum chu ṭhiah vek a ni tawh tih sawi­in, "He bill hi a thi tawh," tiin a sawi. 

Hong Kong sorkarin extra­dition bill siam a rawtna hi mipuiten duh loin dodalna nasa takin an lo lantir tawh a ni. Mipuiten lungawi lohna an lantir avanga bill tihtawp lailawk a nih thu Lam-i'n a sawi hnuah pawh nawrh huaihawt hi chhunzawm reng a ni a; bill chu titawp lailawk loa ṭhiat vek tur leh, Lam pawh Hong Kong leader a nihna aṭanga bang turin an phut a ni. 

Nimina thuthar theh­darhtute a kawmnaah Lam chuan, "Mipuite rilruah sorkarin bill hi a tharthawh leh mai ang tih hlauhthawnna a awm tih kan hria, chutiang ruahmanna chu a awm lo tih ka sawi nawn leh duh a ni. He bill hi a thi tawh a ni," a ti. 

Lam chuan hemi chungchanga sorkar thiltih tum chu a hlawh­chham let der a ni tih a pawm thu a sawi bawk. 



Share this Post

Login to comment
No Comments