Mali inbeihna: Dogon khuaah mi 95 that

Mali-a Dogon thling­tlang khuaa inbeihna thlengah zankhat thil thuah mi 95 thah an ni a,  midang 19 chin hriat loha an awm thu Mali official-te chuan an sawi.

Sorkarin thuchhuah a siamah chuan Dogon khaw beihnaah hian mi 95 zet an thih thu leh Sobane-Kou khuaah mi 19 chin hriat loha an awm thu tarlan a ni a, eng pawl nge tih hriat loh ralthuam keng ten heng khuate hi an bei chiam tih tarlan a ni.

He thu buatsaih lai thleng hian eng pawl mahin an tih a nih thu an la sawi lo a, he lai hmunah tho hian thla thum kalta lawk khan Dogon pawl nia inchhalte chuan Fulani ethnic group mi 160 zet an lo that tawh bawk.

Tualthattute hian ramsa eng emaw zat an that bawk a, pawikhawih laia awm dam chhuak pakhat chuan, ralthuam keng mi 50 vel chuan bike leh pickup hmangin an khua chu an luhchilh tih a sawi. Heng mite hian an khua chu hualin, tlanchhiat tumte chu an kap nghal zel tih a sawi a, mi ṭhenkhat phei chu an hrawkah zai sak an nih thu a sawi bawk a ni. 



Share this Post

Login to comment
No Comments