N.Korea-ah mi tihhlumna hmun tam tak hmu chhuak

Mipui mithmuha mi tihhlumna dan hi tunlai khawvelah chuan kalpui tawh awm lo taka lang ni mah se, South Korea NGO Transitional Justice Working Group chuan report an tihchhuahah, North Korea-ah chuan vantlang hmuha mi tihhlumna hmun 318 zet hmuhchhuah a nih thu an tarlang mauh mai.

TJWG chuan heng hmun-te hi sorkarin mi tihhlum nan a hmang ṭhin tih an tarlang bawk.

SKorea rights group-te hian lui, field, bazar, school leh infiamna tualzawl bulahte heng mi tihhlumna hmunte hi a awm tih an sawi a, mi sang chuangin mi an tihlum lai hi an en ṭhin tih an sawi bawk.

SKorea NGO-te hian report hi nimin khan an tichhuak a, thi tura an chung­thu rel sakte chu tihhlum an nih laiin an chhungte leh an fate an en luih tir ṭhin tih an sawi. Mitthi ruangte chu an chhungte hnenah an pe ngai mang lo tih an sawi bawk. 

Vantlang mithmuha tih­hlum zinga naupang ber chu kum sarih mi lek a ni tih an sawi bawk a ni.

Tan-in chhungah leh labour camp chhungahte pawh mi tihhlumna hi a thleng ṭhin tih an sawi a, labour camp-a dahluh pakhatin hemi chungchang a sawichhuahna pawh hi an tarlang. Kum 2000 chho velah khan a tanpui mi 80-te nen hmeichhe pathum, China-a tlanbo tum an that lai chu en luih tir an ni tih a sawi thu an tarlang tel bawk. 

An mi thahte hi a tlang­puiin an kaphlum ṭhin a, 2005 hmalamah kha chuan inkhaihlumte pawh a la thleng fo tih SKorea group-te chuan an sawi bawk a ni.



Share this Post

Login to comment
No Comments