Sudan buaina: 'Civil disobedience' hman ṭan niah mi pali an thi

Sudan buaina chuan ziaawm lam a la pan thei lo a, nawrh huaihawttu pawl lian ber Sudanese Professionals Association (SPA) thawhpui doctor-te chuan 'Civil disobedience' hman ṭan ni khan security force-te'n mi pali an that tih an sawi.

Civil disobedience hi Pathianni aṭang khan SPA kaihhruaina hnuaiah hian hman ṭan a ni a, civil sorkar siam a nih hma chuan hman chhunzawm zel an tum a ni.

SPA chuan Sudan bank, airport leh electric worker-te chu sipai rorelna duh loh avangin nawrh huaihawt ṭan hma khan man an ni tih an sawi. Sorkar hnathawkte chu ram pum huap nawrha an telh lohna turin hna thawk lui turin an vau tih an sawi bawk.

Hetihlai hian hemi chungchangah hian sipai sorkar Transitional Military Council (TMC) chuan engmah thuchhuah an nei lo thung. 

Sudan-ah hian sipai chakna hmangin sorkar paihthlak a ni a, SPA kaihhruaina hnuaiah civil sorkar din ngiatin nawrh huaihawt a ni a, inbiakna pawh ṭum eng emaw zat neih a ni tawh. Mahse kar liam ta Thawhṭanni khan buaina nasa tak a chhuah avangin nawrh huaihawtna hi a punlun leh a ni.



Share this Post

Login to comment
No Comments