Hong Kong leader Lam-i'n bill thar hnuhdawh tum lo

Hong Kong hruaitu Carrie Lam chuan bill sawisel hlawh tak leh mi tam takin an dodal, thil tisualtu nia hriat China mailand-a thawnna tur bill chu hnuhdawh a ni dawn lo tih a sawi.

Nimina thuthar thehdarhtuten an kawmnaah, Carrie Lam chuan bill thar chu hman a ṭul tih sawiin, human rights humhim chu thil ṭul tak a nih thu a sawi. Hetihlai hian China media-te chuan duh lohna lantirnaah hian ramdang mi an inrawlh tih an lo sawi ve mek bawk.

Lam chuan bill chu Beijing aṭanga chhuak a ni lo tih sawiin, thil ṭha duhna vang a nih thu a sawi. Dan ang takin human rights humhim a ni dawn tih sawiin, bill kalpui dan report chu regular takin legislature lam hnenah report a ni ṭhin dawn tih a sawi a ni.

Pathianni khan he bill duh lo hian mi tam tak chuan Hong Kong-ah kawng an zawh a, 2014-a Umbella Movement hnua dodalna lantirna lian ber nia sawi a ni.

Nawrh huaihawtute chuan Pathiannia kawngzawhnaah khan mi maktaduai khat vel an tel tih an sawi a, mahse police-te chuan mi 2,40,000 vel an ni tih an sawi thung. Nawrh huaihawttute thusawi hi a dik a nih chuan 1997-a British-in China kuta Hong Kong a  pek hnua duh lohna lantirna lian ber a ni dawn a ni. 

Pathiannia kawng zawh huaihawt a nih hnu khan police-te leh nawrh huaihawtte an intibuai zui a, police officer pathum leh journalist hliam tuar an awm tih report a ni. 



Share this Post

Login to comment
No Comments