Peru-ah ruahsur nasa vangin mi 72 an thi

Peru ramah chuan ruahsur nasa avanga tuilian leh leiminah mi 72 an thi tawh. Thuneitute chuan an ram mipui zahve dawnin ruahsur nasa vang hian harsatna an tawk mek niin an sawi. 

Peru sorkar chuan kum sawmhnih chhunga chhiatna an tawh nasat ber a nih thu a sawi a, a bikin an ram hmarlamah tuilian chuan hospital-te a chim bakah, thingtlang khaw ṭhenkhat pawh tlawh pawh theih lohin an awm mek niin a sawi. 

Prime Minister Fernando Zavala chuan tuilian vanga thi hi mi 72 an tling tawh niin Inrinni khan a sawi a, kum 1998-a tuilian avanga mi 374 an thih hnua an ramin chhiatna a tawh lehna rapthlak ber a ni, a ti. 

Peru khawpui, Lima-ah chuan kar kalta chhung khan tui supply an hmu mumal lo. Sorkar chuan khawpui hrang hrangah emergency a puang a, dan leh thupek kenkawh kawngah police-te pui turin sipai eng emaw zat dah an ni bawk. 

Ruahsur nasain chhiatna a thlen vang hian thil man pawh a sang chak hle a, thei man thlengin a sang vek tawh a ni. Lambayeque bialah chuan ruahsur nasain buaina a thlen hi hmang ṭangkaiin jail-a tang mi 22 an tlanchhuak. 

Chile, Bolivia leh Venezuela president-te chuan Peru ram puih an inhuam thu an sawi.


Share this Post

Login to comment
No Comments