NKorea-in rocket engine thar enchhin

North Korea chuan rocket engine thar chu kar kalta Inrinni khan a enchhin a, he engine hi space leh satellite launching programme tana hman a nih tur thu state news agency chuan a tarlang. 

Sohae launch site-a high-thrust rocket engine enchhin hi NKorea ram hotu lu ber, Kim Jong-un pawhin a enpui nia sawi a ni. State news agency, KCNA chuan Kim chuan engine enchhin chu an ram tana thil ropui leh chhinchhiah tlak a nih thu a sawi a, rocket industry lama hmasawnna ropui tak a ni, tia a sawi thu a tarlang bawk. 

Kim chuan rocket engine enchhin a pawimawhzia khawvelin ala hre dawn a ni tiin, enchhin a nih ni chu 'March 18 revolution' tia an hriat a nih tur thu a sawi.

UN chuan NKorea hi long-rang missile test a neih a khapsak a, mahse NKorea chuan satellite programme a kalpui mek chu a muanawm zawnga hman tur a ni tiin a sawi a, mahse hei hi US leh ramdangten an pawm lo. 

China rama cham mek, US Secretary of State Rex Tillerson leh China President Xi Jinping-te inhmuh hma lawkin NKorea hian rocket engine thar hi a enchhin a ni. NKorea hian Demilitarised Zone-a US leh South Korea sipaiten nunchan an zirho chu na takin a lo sawisel tawh bawk a, a lungawi lohna hi kawng hrang hrangin a lo lantir tawh bawk. 

Tun thla tir lam khan NKorea hian UN-in a hrekna palzutin, ṭum li ballistic missile a enchhin leh tawh a, hengte hi Sea of Japan-ah an tla a ni.


Share this Post

Login to comment
No Comments