NKorea-in ICBM a enchhin thei : KCNA

North Korea official news agency, KCNA chuan an ram chuan intercontinental ballistic missile (ICBM) chu a duh hun hunah a enchhin thei reng niin a sawi. 

January 1 khan NKorea ram hotu, Kim Jong-un chuan ICBM an kahchhuah thuai tur thu a lo sawi tawh a ni. 

KCNA chuan Kim Jong-un-a'n kahchhuah tura a ruahman aṭangin ICBM hi an kapchhuak thei reng tawh niin a sawi a, an ramin ralthuam siam lama ṭan a lakna chhanah US a puh bawk. 

US chuan NKorea hian nikum lamah ṭum eng emaw zat ralthuamte a enchhin hnuah, NKorea hian a nuclear leh missile lam pawh a nei ṭha chho hle niin a lo sawi tawh a ni. 

Hetihlai hian expert-te chuan NKorea hian ICBM enchhin thei turin a inpeih niin sawi mah se, he ralthuam hi an duh ang taka siam tur chuan kum eng emaw zat a la ngai dawn niin an sawi thung.

ICBM hi an nei a nih chuan US tan pawh a hlauhawm pha dawn a ni. US hi North Korea aṭangin km 9,000 vela hla a ni a, ICBM hian km 5,500 a kap pha a, ṭhenkhat chu km 10,000 leh a aia thui kap pha thei tura siam an ni bawk.


Share this Post

Login to comment
No Comments