Thailand PM-in ban a tum lo Nawrh huaihawtte'n chhunzawm zel tum

Thailand prime minister Prayuth Chan-ocha chuan sorkar laka lungawi lohna lantira nawrh huaihawtten bang turin phut mah se PM a nihna aṭanga ban a tum lo tih nimin khan a sawi. Hetih lai hian nawrh huaihawtte chuan sorkarin emergency puang mah se nawrh chhunzawm zel an tum tih an sawi ve bawk. 

Nawrh huaihawtte avanga sorkarin state of emergency a puan hnuah pawh Ningani khan eptute hi Bangkok-ah an la pungkhawm a, PM bang tura an phutna leh lal thuneihna tihnep a nih theihna atana ram danpui siamṭhat an phutna chu an lantir chhunzawm zel dawn tih an sawi a ni. Zirlaite kaihhruaia nawrh huaihawt hi July thla aṭang khan neih ṭan a ni a, Parliament ṭhiat a, inthlan ṭhat buatsaih an phut bawk a ni. 

Nimin zing khan Prayuth chuan emergency cabinet meeting a ko a, lungawi lohna lantir zel a nih chuan sorkarin emergency dan hnuaia a thuneihna chu hman a hreh dawn lo tih a sawi. Prayuth chuan, "Ka bang dawn lo. Boruak a ṭhat loh chhoh zel chuan sorkar hian emergency dan hi khawng taka a lekkawh a ngai dawn a ni. 

He dan hi ni 30 chhung hman tura tih a ni a, mahse boruakin ṭhat lam a pan chuan hei aia rei lo pawh a ni thei," a ti. Emergency dan hnuaiah hian thuneitute chuan warrant awm kher loin mi man theihna te, an thil neihte laksak theihna an nei a ni. Hei bakah hian online hmangin ram himna tichhe thei zawnga thu thehdarhte khap a ni bawk. 



Share this Post

Login to comment
No Comments