Kyrgyzstan President-in PM thar a pawm ta PM thar a pawm tukah President a bang nghal

Kyrgyzstan Parliament-in prime minister atana a thlan, Sadyr Japarov chu President Sooronbay Jeenbekov chuan a tirah pawm lo mah se Nilaini khan a pawm a, mahse nimin khan President hi a bang zui ve nghal a ni. 

President Jeenbekov chuan October 4-a an ram inthlanpui result pawm loa eptuten nawrh an huaihawt avang leh, nawrh huaihawtte leh security force-te inkara buaina nasa tak chhuak tur venna atan President a nihna aṭanga a ban thu hi a sawi. Eptute hian President hi bang tura phutin a chenna bula kawngzawh an tum a, kawng an zawh luih chuan security force-te nen na taka innawrin, silai hmehpuah leh thisen chhuahna hial a thleng thei tih a sawi. Hei vang hian an ram chanchina President zinga thisen chhuahtirtu nih chu a duh lo tih a sawi. 

Inthlan zawh hnuah eptute hian vote tihchingpen nia sawiin nawrh an huaihawt chhunzawm reng a, sorkar building pawimawh leh Parliament te chu an thununna hnuaiah an dah zui a ni. Eptute nawrh huaihawt vang hian prime minister a nihna aṭangin Kubatbek Boronov pawh a lo ban phah tawh bawk. PM thlak tur hian eptu lamin an thunun, Parliament chuan Sadyr Japarov chu a thlang ta a ni. 

Sadyr Japarov hi public official a kidnap avangin jail-ah a tang a, kar liam ta khan ramchhunga nawrh huaihawt mek eptute chuan jail aṭangin an chhuah a ni. Kar liam ta Inrinni khan Parliament chuan PM thar atan Japarov hi an thlang a, mahse jail aṭanga chhuak hlim hlawt leh thiam loh chantir tawh a nih avangin President Jeenbekov chuan a pawm thei lo tih a sawi. Mahse Parliament-in a ṭum hnihna atana an thlan nawn leh tak avangin Nilaini khan  PM atan a pawm ta a ni. 

PM thar Japarov hi kum 2005 khan Parliament member atan thlan tlin niin, president hlui Kurmanbek Bakiev thlawptu a ni. Kum 2011-a eirukna kaihhnawih thil avanga Bakiev paihthlak a nih hnuah a thlawptu party-ah a awm chhunzawm zel. Kum 2013 khan Kumtor goldmine project chungchanga lungawi lohna lantir a nih ṭuma provincial governor a kidnap avangin thiam loh chantir niin, kum 11 leh a chanve tang tura hrem a ni. Mahse man a nih hmain Kazaskhstan-a a tlanchhia a, kum 2017 March thla khan Kazah-Kyrgyz border-ah an man a ni.



Share this Post

Login to comment
No Comments