Israel-in Gaza Strip-a Fuel phurh luh khap

Israel chuan Nilaini zan khan Gaza Strip-a fuel phurh luh khapna a ti chhuak a, Gaza sangha mantute tana kal phal chin pawh tuipui mel 15 aṭangin mel 8-ah a tihzim sak bawk. 

Hetianga Israel-in hma a lak chhan hi kar liam taa Gaza aṭanga Israel chhim lama Pales­tinian-ten balloon alh an chhuah vang a ni. He balloon alh vang hian Israel ramri bula hmun 30 chuang­ah kangmei a chhuak tih Israel media-te chuan an sawi.

Hei vang hian Israel thuneitute chuan August 11 aṭanga hman ṭan, Israel leh Egypt aṭanga Gaza luhka 'Kerem Shalom' kawng chu an khar a, kawng an khar vang hian Palestinian Centre for Human Rights (PCHR) chuan Palestinian mi maktaduai 2 chuangin harsatna an tawh phah thu tarlangin, he kawng hi mamawh chawk luhna anih avangin hnathawh lai a tihkhaihlak thu leh sumdawnna te chu a nghawng mek tih a tarlang. 



Share this Post

Login to comment
No Comments