Spain-in June 7 thleng state of alarm pawtsei

Europe ram zinga Covid-19 hri kai tamna ber, Spain chuan June 7 thleng state of alarm (emergency) a puan chu a vawi ngana atan pawtsei leh.

Spain parliament-ah Covid-19 hri leng vanga state of alarm puan chu ennawnin vote lak a ni a, puan chhunzawm duh lamah hian vote 177 a tla a, a duh lo lamah vote 162 a tla thung. 

March 15 khan Spain-ah hian state of alarm puan a ni. Hri leng hian ziaawm lam pan ṭan mah se a la tawp mai loh avangin emergency hi puan belh zel a ni. Spain prime minister Pedro Sanchez chuan an ram sorkarin state of alarm a puan avang hian hri inkaichhawnna lak ata an ram mipuite a ven thu sawiin, hri kai tamna ber an ram khawpui Madrid-ah pawh hri lengin ziaawm lam a pan thu a sawi bawk.

Hetih lai  right-wing People's Party leh midangte chuan khuarhkhirhna siam hi sawiselin mimal zalenna inrahbehsakna a ni, an ti thung. 

Spain sorkarin state of alarm a puan hi sorkarin emergency a puan theih pathum zinga hmasa ber a ni a, he emergency hnuaiah hian sorkar chuan mipui chetvel dan a thunun thei a, thil siamchhuah a thunun thei a, sipaite chu a ṭulna hmun hmunah a hmang thei a, private bungrua te chu sorkar chuan a hmansak thei bawk. State of alarm bakah hian 'State of Exception' leh 'Martial Law' pawh a la awm bawk a ni. 



Share this Post

Login to comment
No Comments