WHO-in G20 ramte hmanrua siam chak turin duh

World Health Organization (WHO) chuan Covid-19 kai mi 300,000 chuang an awm tawh avangin ram changkang zawk, G20 ramte chu he hri dona kawnga hmanraw mamawhte chak zawka siam turin a ngen.

A tirah ni 67 chhungin hri kai hi mi 100,000 ah an tling chho a, a hnuah ni 11 chhungin midang 100,000 in kai lehin, tunah chuan ni 4 chhung lekin he hri kai hi mi 100,000 an awm hman a ni. A darh chak em vang hian WHO Director General Tedros Adhanom Ghebreyesus chuan he hri beih dan kawng hi tlema thlak a pawimawh a ni, a ti.

Inven (defending) ringawt chuan football-ah chak a theih loh a, chak tur chuan goal khung a ngai. Chuvang chuan kan beih (attack) a ngai tawh a ni tiin Tedros chuan Fifa president Gianni Infantino nena 'kick out coronavirus' campaign an neih dunnaah a sawi. 

Tedros chuan, "He hri darh zel tur venna atan hian mahni in luma tawm rih chu a him rih ber a, mahse chutih rualin inveng (defending) ringawt chuan he hri hi hneh a har dawn a, ruahman lawkna ṭha tak nen, rinhlelh zawng zawng kan hriatte test nei thei zel ila, positive-te chu kan dahhran mai bakah uluk taka enkawlna pek zui ni thei se. Kan dahhrante chhung leh khat emaw dahhrante hnaivaite chu chhui zui zel ni thei se, " tiin a sawi a ni.

Duh ang tawka invenna (protective equipment) a tam tawk loh avangin, medical team ṭhenkhatte chuan he hri hi an kai phah nual a ni. Hei vang hian he hri venna kawnga invenna (protective equipment) siam chhuah tam a ṭul thu leh G20 ramte chuan tunkar hian siam chhuak tam thei se a duh tih Tedros chuan a sawi bawk.



Share this Post

Login to comment
No Comments