Jordan-in Covid-19 kaite enkawl nan hydroxychloroquine hmang

Jordan Food and Drug Administration (FDA)-a physician-te chuan an rama Covid-19 kaite enkawl nan hydroxychloroquine leh antiviral medicine inpawlh an hmang. 

Covid-19 laka invenna tur damdawi hmuhchhuah tuma khawvel mi thiamte an intlansiak luai luaina karah, hydroxychloroquine leh antiviral medicine inchawhpawlh chu Jordan-a medical team-ten he hri kaite enkawl nan an hman thu FDA head Dr Hayel Obeida chuan a sawi.

Kar kal ta Zirtawpni khan US president Do­nald Trump chuan Azithromycin leh malaria damdawi hmanga an rama Covid-19 kaite an enkawl thu a twitter lamah a lo sawi lang ve tawh bawk. Hydroxychloroquine hi a tlangpuiin malaria natna neite enkawlna damdawia hman ṭhin a ni. 

Hydroxychloroquine leh antiviral medicine chawhpawlh hman hi dan ang thlapa hman emaw approve emaw a ni lo a, he hri leng mek damdawi a awm mai hrih loh avangin he damdawi hi an hmang rih mai tih Dr Obeida chuan a sawi a, hri kai zinga na zualte emaw stage 2 thleng tawhte enkawl nana hman a nih thu a sawi. 

Jordan health minister Dr Saad Jaber chuan an ramah Pathianni khan Covid-19 kai thar hi mi 13 an awm thu a sawi a, an ram pum puiah he hri kai hi mi 112 an awm tawh tih a sawi bawk. Jordan khawpui Amman leh Dead Sea-ah mi 5,000 chuang khunghran (qua­rantine) mek an ni bawk. Ningani khan Jordan-ah hian state emergency puan a ni a, kar liam ta Zirtawpni khan rampum­ah curfew puan zui a ni.



Share this Post

Login to comment
No Comments