Ukraine thlawhtheihna chesuala thite hriatrenga hunah Canada PM-in thutlukna dik pek a tiam

Zirtawpni liam taa Iran-a Ukraine thlawhtheihna tlaa Canada mi thite hriatrengna hun neihah Canada prime minister Justin Trudeau chuan thlawh­theihna chesuala thite chuan thutlukna dik an hmu ngei dawn tih a tiam. 

Ukraine thlawhtheihnaah hian Canada mi 57 an chuang a, an vai hian an thi vek a ni. Edmonton, Alberta-a mitthite hriatrengna hun hmannaah Justin Trudeau chuan Iran aṭanga chhanna a phut chhuah ngei dawn thu sawiin, chhanna an hmun hma chuan an bei zel dawn tih a sawi.

"He chhiatna hi thleng lo tur a ni, he hun harsa takah hian in thlawpna ka mamawh dawn a ni. In laka dikna leh rintlakna phut turin chhan ṭha tak min pe a ni," tiin mipui pungkhawm hmaah a sawi. Canada hian Pathianni khan an ram chhung hmun hrang hrangah mitthite sunna leh hriatrengna hun hi an hmang a, kal an ṭhahnem hle.

Zirtawpni liam taa Iran-a Ukraine thlawhtheihna tla hi Iran chuan tihpalh thil thua a kah thlak niin a sawi tawh a, dem a hlawh hle bawk. He thlawhtheihna tlaah hian a chhunga chuang zawng zawng, mi 176-te chu an thi vek a ni.

Tehran-ah sorkar duh lohna lantir

Iran sorkarin tihpalh thil thuin thlawhtheihna hi a kap thla tih a puan hnu lawkah khan an ram khawpui Tehran-ah chuan sorkar duh lohna lantir nghal a ni a, Inrinni leh Pathianni khan mi tam tak an pungkhawm.

Pungkhawmte hian, "Kan hmelmate chu America niin dawt min hrilh a, mahse kan hmelma tak takte chu hetah hian an awm," tih thute an au chhuahpui. Duh lohna lantirtu zingah hian hmeichhia pawh an tam hle.

Donald Trump-a'n Iran a vau

US president Donald Trump chuan a twitter-ah Iran vau zui bawkin sorkar duh lohna lantirtute chu bei zui lo turin a ti. "Khawvelin a tlir reng a, chu zawng aia pawimawh chu USA-in a thlir a ni," a ti. Iran chuan inbiakna neih a duh phawt chuan an inhawng reng tih sawiin, internet service mipuite hnena pe let tur leh thuthar thehdarhtute chu an duh anga taka  zalen taka awmtir turin a ti bawk. Iran-in Iran mite a thah chu titawp turin a ti bawk a ni. 

Hetihlai hian UK pawhin Teahran-a UK ambassador man a nih chu an dem thu sawiin, inter­national law palzutna a ni, an ti.

UK Foreign Secretary Domi­nic Raab chuan an ambassador Rob Macaire chu Inrinni khan thlawhtheihna tlaa thite hriat­rengna hun hmanna a kal chu Iran hian an lo man tih a sawi. 



Share this Post

Login to comment
No Comments