Iraq PM-in banna a thehlut

Ni 40 chuang zet Iraq khawpui Baghdad leh Iraq chhim lama nawrh huaihawt a nih hunah, Iraq prime minister Adel Abdul Mahdi chuan Parliament-ah a banna a thehlut. 

Kar kal ta Zirtawpni khan Prime Minister Adel Abdul Mahdi chuan a ban tur thu hi a puang a, Inrinni khan a banna lehkha hi Parliament-ah a thehluh a ni.

Inrinni khan cabinet ṭhut­khawm neih a ni a, hetah hian Abdul Mahdi banna lehkha leh document pawimawhte chu enfiah a ni. Nimin khan Iraq parliament inkhawmah Abdul Mahdi banna hi ngaihtuah zui nghal a ni. 

PM-in banna a thehluh tukah security force-te leh nawrh huaihawtte inbeihnaah mi pathum an thi a, mi 58 chuang zetin hliam an tuar bawk. Shia muslim hruaitute pawn Prime Minister leh a kaihhruai sorkar an thlawpna chu an lo ti tawp ve bawk a ni. Thla hlui khan Iraq president Barham Salih chuan Adel Abdul Mahdi hi PM a nihna aṭanga ban a hnial loh thu a sawi.

Abdul Mahdi chuan Prime Minister aṭanga a banna hi parlia­ment-in an pawm a nih chuan, cabinet-in dan a pass thei tawh dawn lo a, mahse dan hmannaa thutlukna siam theitu chu a la ni reng ang, a ti. Hetih lai hian Parliament-in Abdul Mahdi banna tura Iraq-in dan siam chiang tak a neih loh thu mithiamte chuan an sawi ve bawk.

Iraq-ah hian an ram economy siamṭhat phutin, mipuiten hun eng emaw chen sorkar laka lungawi lohna an lantir tawh. Electric leh tui mumal loh avang leh economy a tlakchhiat mai bakah, eirukna a hluar em avangin mipuite chuan sorkar hi bang tura phutin, October ni 1 aṭang khan lungawi lohna an lantir tawh a ni. 

Nawrh huaihawtnaa buaina chhuak vangin mi 400 chuangin nunna an chan tawh a, vawi tam tak security force-te chuan silai leh mittui tlakna hloin nawrh huaihawtte hi hnawhdarh tumin an bei a, hei vang hian mi tam takin hliam an tawrh phah a ni. United Nations chuan nawrh huaihawt titawp tawh tur hian a lo ngen tawh bawk. 



Share this Post

Login to comment
No Comments