Britain inthlanpui neih tur atan campaign nei ṭan

Britain inthlanpui, December 12-a neih tur atana official campaign chu Nilaini aṭang khan neih ṭan a ni ta. 

Nilaini khan prime minister Boris Johnson chuan Queen Elizabeth II hmuin, Parliament ṭhiah phalna a dil. Hemi hnu hian Parliament chu ṭhiah a ni ta a ni. 

Parliament chu ṭhiah a nih hnu hian inthlanpui neih tur atana campaign theih hun a inṭan a ni. December 12-a inthlanpui neih tur hi kum nga chhunga Britain-in inthlanpui a neih ṭum thumna tur a ni a, kum 2015 leh 2017 khan inthlan an lo nei tawh. 

Boris Johnson chuan Nilaini zan khan England Midland region-ah Conservative Party election campaign a hawng nghal a, Bir­mingham-ah rally a nei a ni. 

Labour Party hruaitu Jeremy Corbyn pawh campaign  a ṭan nghal a, hetihlai hian Labour party deputy leader Tom Watson chuan inthlanah hian chuh a tum lo tih a sawi. Watson leh Corbyn hi ṭum eng emaw zat vantlang hriatah an insawisel tawn fo a, mahse Watson chuan hemi avanga inthlan chuh lo tur a nih loh thu leh, mimal thil avang zawk a nih thu a sawi. Labour party member nghet tak a ni zel dawn a, Labour candidate-te tan theihtawp a chhuahpui zel tur thu a sawi. 

Inthlanpui neih turah hian vote nei mi maktaduai 46 an awm a, anni hian Parliament chamber pakhat zawk, House of Commons member 650 an thlang chhuak dawn a ni. Sorkar siam tur chuan MP 326 neih phak a ngai. Party mala sorkar siam thei an awm loh chuan, MP ngah ber party chu party dangte thawhpuiin ṭangrual sorkar a siampui thei dawn a ni. Prime miniter hi mipuiten an thlang lo a, sorkarna siamtu tur MP-ten thlang chhuakin, Queen Elizabeth II in an mi thlan chhuah chu a lo ruat a ni. 

Inthlan campaign-na atan hian party-te chu seat 650-a an chuh vek chuan pound maktaduai 19.5 chin an hman phalsak a ni. Seat khat atana sum senso phalsak zat hi pound 30,000 ang a ni. Kum 2017-a inthlan senso-a party hrang hrangte sum hman kha kum 2011 aiin 42.7% zetin a sang a, kumin inthlanah hian a san belh leh hle rin a ni. 

Kum 1922 aṭang khan Britain inthlanpuiah hian Conservative emaw, Labour party emaw an la chak ziah a ni. Kumin inthlan turah pawh a inbei ber tur an ni leh bawk. Hetihlai hian kum 2017 inthlanpuiah khan Liberal Democrats chuan hma a rawn sawn chho hle. 



Share this Post

Login to comment
No Comments