Nobel Prize dawngtu tur puang

Nobel Assembly chuan kumina Nobel Prize in Phy­siology or Medicine leh Nobel Prize in Physics dawngtu tur a puang tawh. 

Nobel Prize in Physiology or Medicine dawng tur hian US researcher Willian Kaelin, Gregg Semenza leh British researcher Peter Ratcliffe-te thlan an ni. Jury chuan he chawimawina sang dawng tura thlan an nih chhan chu oxygen level-in cellular metabolism leh physiological function a nghawng dan zirchiang a, an hrilhfiah vang a ni tih an sawi. An zirchianna hmang hian anaemia, cancer leh natna dang emaw zat do let dan tur kawng thar a inhawng a ni, a ti. 

Kaelin hi US-a Howard Hughes Medical Institute-ah a thawk a, Semenza hi John Hopkins Institute for Cell Engineering-a Vascular Research Program director a ni. Ratcliffe hi Lon­don-a Francis Crick Institute-a clinical research-ah director niin, Oxford-a Target Discovery Institute-a director a ni bawk. 

Nobel Prize for Physics dawng turin James Peebles, Michel Mayor leh Didier Queloz-te thlan an ni bawk. Peebles hi kum 84 mi niin US-a Princeton University-a thawk a ni a, Michel Mayor (77)  hi University of Geneva, Switzerland-ah a thawk a ni. 

Didier Queloz hi University of Geneva leh UK-a University of Cambridge-ah a thawk bawk. James Peebles hi 'theore­tical discoveries in physical cosmology' avangin chawimawi­na dawng tura thlan a ni a, Mayor leh Queloz-te hi solar-type star kalhualtu exoplanet an hmuhchhuah avanga thlan an ni bawk. 

Nobel Prize hian Swedish knoror maktaduai 9 (US dollar 914,000) a keng tel a, chawi­mawina dawng tura thlante hi pakhat aia tam an nih chuan a sum hi an insem dawn a ni. He chawimawina hi December 10 hian Stockholm-ah hlan an ni dawn a ni. 



Share this Post

Login to comment
No Comments