NKorea-in US leh Europe ram ṭhenkhat vau

North Korea chuan Thawhṭanni khan United Nations Security Council-a Pyongyang missile test dodalna chungchang United States, Britain, France leh Germany-ten an sawichhuah chu duh loin, an ram thuneihna humhim duhna a tilian sauh dawn tih a sawi.

North Korea UN Ambassador Kim Song chuan UK, France leh Germany hmalaknaah chuan US chu a inrawlh tih an hrechiang hle tih a sawi bawk.

United Nations Security Council member 15-te hian nimin khan kar hmasaa NKorea-in submarine aṭanga ballistic missile test a neih chungchangah closed door meeting an nei a ni.

Kim Song chuan US leh a hnungzuituten UN Security Council meeting-ah an ram (NKorea)-in an invenna tura an hmalakna chungchang an sawichhuak a nih chuan an thuneihna venhim an tumna chu a nasa zual sauh dawn tih sawiin, US leh Europre ram ṭhen­-khat chu nasa zawka missile enchhinah a vau.

Kim chuan,"Khawngaihin uluk takin hun lo awm turah eng nge kan tih dawn lo thlir rawh u," tia sawiin,"missile dang kahchhuah tur chungchang hei hian a kawk lo," tiin a sawi zui.

Nkorea hian kar hmasa Nilaini khan missile hi a enchhin leh a ni, UNSC chuan ballistic missile hmang lo turin Pyongyang hi a khap a, mahse ṭum eng emaw zat chu an enchhin tawh thung. 



Share this Post

Login to comment
No Comments