United Nations sum lamah indaih lo

United Nations Secretary General Antonio Guterres chuan UN-in US dollar maktaduai 230 indaih lohna an neih thu sawi langin, October thlaah phei chuan UN-in sum lamah harsatna nasa zawk a tawk dawn niin a sawi. 

UN secretariat-ah hian hnathawk mi 37,000 an awm a, heng mite hlawh tur hi chu thla hlui khan liquidity reserves aṭangin an pek mai theih thu Guterres chuan a sawi. October thla aṭang hi chuan hlawh pek chungchangah pawh harsatna an tawh tur thu a sawi bawk. 

Kumin hian UN member ramte hian kumtina budget-a pawisa an dah ṭhin mamawh zat 70% chauh an thawhkhawm a, hemi avang hian sum lama indaih lohna zat chu thla hmasa khan US dollar  mtd 230 a ni.

Heng avangte hian Guterres chuan conference leh meeting-te chu a sawn hlat phah a, service a tih tlem mai bakah thil pawimawh viau a nih loh chuan, UN official-te chu zin chhuak lo turin a chah bawk.

Guterres hian kumin kumtir lam khan UN member-te hnenah hian, sum lama harsatna a awm avangin pawisa thawh tam turin a ngen a, mahse a ngenna hi an hnawlsak hlawm a ni. 

Kum 2018-2019 UN budget chu US dollar vaibelchhe 5.4 a nih thu tarlangin, heng zinga 22% chu US thawh a ni. Guterres chuan UN-in pawisa a neih leh neih loh mawhphurtu tak takte chu UN member ramte an ni, a ti. 



Share this Post

Login to comment
No Comments