N Korea-in nuclear chungchangah US nena inbiakna neih leh duh

North Korea vice foreign minister Choe Son-hui chuan an ram leh US chuan nuclear ralthuam tihtlem a nih theihna turin September thla tawpah inbiakna nei leh se a duh tih Thawhṭanni khan a sawi.

US Secretary of State Mike Pompeo chuan North Korea lakah hian beiseina a siam sak hnuah Choe Son-hui chuan US nena thawhdun leh a duh thu hi a sawi chhuak ta a ni. 

Nikum khan US president Donald Trump leh North Korea hotupa Kim Jong-Un-te chuan Korean peninsula-ah nuclear ralthuam tihtlem a nih theih nana thawhdunna kalpui dun turin inremna an lo nei tawh a, mahse North Korea lam chuan kumin February thlaa Hanoi Summit vawihnih neihnaah khan US hi a thurualpui chhunzawm thei ta lo a ni. 

June 30 khan US president Trump, NKorea leader Kim leh South Korea president Moon Jae-in-te hian Demilitarized Zone (DMZ) chungchangah meeting an lo nei ho tawh a, he hunah hian Trump leh Kim-te chuan thawh­dunna an nei dawn niin a lang a, mahse tun thleng hian thawh­dunna mumal tak a la awm lo. 

"Kim nen hian inlaichhinna 

ṭha tak kan nei a, ani nena meeting neih hi englai pawhin thil ṭha a ni. Thil lo thleng zel tur chu hunin a hril zel dawn a ni," tiin Trump chuan Thawhṭanni khan White House-ah a sawi. 

US nena inbiakna neih leh an duh thu an sawi hnu lawk, nimin khan NKorea chuan projectile pahnih a kapchhuak leh. NKorean projectile pahnih hi South Pyongan Province aṭanga kahchhuah a ni a, an ram hmarchhak lam tuipuiah kahchhuah a nih thu South Korea Joint Chief of Staff leh Defence Ministry chuan a tarlang. Nimina a kahchhuah hi eng tak nge tih erawh hriatchian ala ni lo a, mahse July thla hnulama a kahchhuah vawi riatna a ni tawh a ni. 

US Secretary of State Mike Pompeo chuan NKorea projectile kahchhuah leh chuan US chu a tihrilhhai tak zet a, mahse NKorea nena kan tum chu kan chiang a, dawhkanah kan sawidun leh theih ka beisei, a ti. 



Share this Post

Login to comment
No Comments