KHAWTHLIR

Larsap leh BRO

Larsap PS Sreedharan Pillai chuan December 9, Thawhṭanni khan Border Roads Organisation (BRO) hotute Raj Bhavan-ah a kâwm a, Mizorama kawng an enkawlte dinhmun leh an hmalakna hrang hrang a sawipui. BRO hotute chuan an hmalak mek leh an hnathawh dante Larsap hi a lem nen an hrilhfiah a ni.


Vanva lui tlawh

Lunglei HPC vice chairman Lawmawma Tochhawng, MLA chuan nimin khan Haulawng leh Bualpui 'V' inkara Vanva lui, YMA Vanva Group-in an humhalh chu a hmunah a enfiah. Lawmawma Tochhawng hi Vanva Group YMA hruaitute'n lo dawngsawngin, an hmalak dan an lo hrilh. HPC Vice Chairman chuan, Vanva luia thlir tham sangha a awm chu lawmawm a tih thu sawiin, nghahrah, nghalim, nghavâng leh ngharulte inthlahpunna atan lui chu HPC fund hmanga cheibàwl a duh thu leh lui humhalhna kawnga Krismas leh kumthar vuakveta an zangkhai nan leh venpui vena atan a theih ang pawisa pek a inhuam thu YMA hruaitute a hrilh.


ZPM 'Zau Titi'

ZPM chuan December 9, Thawhṭanni khan Khanpui khuaah 'Zau Titi' an huaihawt a, Khanpui khuaa loneitute'n thil chi hrang hrang an sawiho. Loneitute'n an tawnhriat hrang hrang an sawi a, K Lalruata'n sawhthing chungchang sawiin, H Chawikima'n zikhlûm chungchang a sawi thung a; ZPM Gen.Hqrs. aṭangin treasurer C Lalṭanpuia, general Secre­tary B Lalchhanzova leh hruaitu dangte'n an hmanpui a ni.


IKK pastor Pathum nemnghet

Isua Krista Kohhran (IKK), Vaivakawna hmunpui neite chuan December 5-8, 2019 chhung khan Keiṭum khuaah General Assembly vawi 52-na an hmang a, Pathianni-ah pastor pathum an nemnghet. Assembly-ah hian December 6-7 chhungin Keiṭum community hall-ah ro an rél a; kum 2019-20 budget atan cheng nuai 183.54 an pawm a ni. Report-a a lan danin, kum 2018-19 chhunga an budget chu Rs. 22,65,552-in an khûm a ni.


DAWNTISEI