KHAWTHLIR

Lungphùm phúm

Rural Development minister Lalruatkima chuan June 22, Inrinni khan Sihhmui Community Hall sak mekna hmunah community hall lungphùm a phúm. RD Minister chuan, SEDP hnuaia hman tur sum ruahman a nih tawh thu sawiin, "Hmasawnna ruhrel hrang hranga mipuite'n kan chhawr ṭangkai theih tur a awm. Mipui thlàwpna tel lo chuan sorkar hmalaknate a hlawhchham ṭhin," a ti. Minister hi bialtu MLA Zothantluanga'n a ṭawiawm a ni.


Sum dah zat

PWD changtu chief minister Zoramthanga chuan INC member C Ngunlianchunga zawhna ziaka chhangin, kum 2018-19 chhungin NEDP hnuaiah PWD tan cheng nuai 22,494.54 dah a nih thu a tarlang a, "Cheng nuai 20,632.74 chu kawng siamna atan a ni a, cheng nuai 1861.80 chu building work atan a ni," a ti.


Loneitute leh Scientist inkâwm

Agricultural Technology Management Agency, Champhai district bultumin June 22, Inrinni khan IPR conference hall, Champhaiah Farmers Scientist Interaction Programme buatsaih a ni a, vaimin ei chhetu pangang fall armyworm chungchang ICAR, Kolasib aṭanga tel scientist-te nen zirho a ni.


Thisen pe

June 22, Inrinni khan Armed Veng Branch YMA chuan Synod Hospital tan thisen unit 56 an pe a, a petute mipa 48 leh leh hmeichhia pariat an ni a; Inrinni lo awm leh turah pek chhunzawm an tum. ṬKP Coordination, 

Aizawl huaihawtin Zotlang Bial ṬKP-te'n Aizawl Civil Hospital tan unit 47 an pe a, petute mipa 37 leh hmeichhia 10 an ni. Lunglei Bazar Veng Bial KṬP-te'n Christian Hospital, Serkawn tan unit 25 an pe. Lawngtlai District Hospital tan Salvation Army Youth, Lawngtlai CO Bialte'n unit 18 leh ṬKP Thingkah Unit-te'n unit sarih an pe bawk.


DAWNTISEI