KHAWTHLIR

LC House hawng

Minister of state Lalruatkima chuan nimin khan Bungkawn Vengthar Local Council House a hawng. Minister chuan, MNF sorkar tawh chhungin Election Code of Conduct rei tak avang leh Covid-19 hripui vang­in hna a khaihlak nasa chungin, MNF sorkarin hmasawnna hna a thawk nasa hle niin a sawi.


Lockdown hlîp

August 2, Pathianni chhûn leh zan aṭanga Aizawla veng ṭhenkhat leh khaw dang ṭhenkhata total lockdown puang zingah, Chanmari, Zarkawt leh Sairangahte total lockdown an hlîp tawh. Hei hi nimin tlai dar 5 thlenga dinhmun a ni.


Class tan dawn

National Institute of Technology (NIT)-Mizoram chuan vawiin, August 6 aṭangin academic session 2020-21 atan zirna (class) an ṭan dawn. NIT-Mizoram hian kum 2019-20 atana B.Tech leh M.Tech exam chu online-in an buatsaih a, result pawh an tichhuak tawh a ni.


Lawmthu sawi

Tuipuiral Group YMA chuan thuchhuah siamin, tun hnaia lìrnghîngin ṭum 95 lai Mizoram khawchhak lam a sâwi chungchangah, lir­nghing tuarte hnena ṭan­puina, thlahualna leh chhawmdawlna petu te, a ṭul apiang buaipuitu te, ṭawngṭaisaktu te, thla­muan tura a hmuna tlawhtu te, Pathian thu lama kaihruaitute zawng zawng chungah an lawm tak zet tih an tarlang.


Covid-19 vei lo

Grand Hotel-a hnathawktu Covid-19 positive-in Zonet Office a dawr ṭuma lo chhâwntu, rinhlelh thila khung hran Zonet-a hnathawk chu ZMC-ah a swab sample endik a ni a, Covid-19 a vei lo (negative) tih nimin khan finfiah a ni.


ZMC ICU khum IOC-in a pe dawn

Indian Oil Corporation (IOC)-in corporate social responsibility (CSR) aṭanga State Referral Hospital (ZMC)-a Covid-19 veite enkawlna tur ICU khum 15 an pekna turin nimin khan minister of state K Lalrinliana pisaah thuthlung ziah a ni. IOC hian ICU khum 15 atan hian Rs. 7,30,785 an pe niin sorkar thuchhuah chuan a tarlang.


DAWNTISEI