UEFA Super Cup: Liverpool vs Chelsea Super Frankie a kun reng dawn em?

Champions League 2007-08 season khan semifinal-ah Chelsea leh Liverpool an intawng a, Anfield-ah 1-1 a an inhnehtawk hnuin Stamford Bridge-ah minute 120 hnuah 3-2 in Blues an chak. 

Chelsea tana goal khungtu zingah Frank Lampard a tel a, Liverpool fans tam tak mittui a luantir. Kum 11 a liam a, Lampard-a'n Europe inelnaah Liverpool a tawng leh dawn ta. 

Tunah erawh player ni loin coach a ni tawh a, engkim a danglam tawh. Reds fan-ten an thinlung kehsawm tir tawhtu hi vuak let an duh dawn a, Lampard-a'n coach a nih hnua a nomawi hmasa ber tur a thlir ang. 

Lampard-a'n a ropui ṭhinna hmun Chelsea pan mah se a bul ṭanna erawh beisei ang a ni lo a, thawnthu zawng zawng hi a tirah a ngaihnawm nghal kher lo tih hrilhhriat a ni - Manchester United-in 4-0 in an sawp a, Lampard a mualpho. 

Super Frankie... bang tawh rawh!

Frank Lampard-a'n a match hmasa ber aṭangin top level-a boruak sanzia a tem nghal a, rilru paukhauh ṭulzia a hre tel nghal. Indawmkun hman an ni lo a, ṭap hman an ni lo. 

Chelsea hi an tlawm leh a nih erawh chuan an match hmasa pahnihah an tlawm nghal dawn tihna a ni a, hei hian an season kal zel turah thui takin nghawng a nei dawn. 

Lampard chuan, "Chelsea kan ni a, 4-0 ngawta tlawm kha chu zahthlak tak a ni. Kan thawh lehnghal a ngai a, ngui taka awm reng hman pawh kan ni lo. Super Cup-in min hmuak a ni," a ti. 

Mahse, Chelsea tan Liverpool hneh a awlsam dawn lo. Jurgen Klopp-a team hi European champion an ni a, Premier League-ah pawh champion tura rinkai zinga mi an ni. 

Dil loh zawk malsawmna

Europa League champion nih a ropui a, mahse United laka tlawm hnu lawka he inelna champion nih vanga Liverpool tawn nghal a ṭul erawh 'ka dil loh zawk' tih palh mai awl tak tur a ni. 

Mahse, Chelsea tan Liverpool hi malsawmna an ni thei - Red Devils hneh loh hnu lawka Klopp leh a naute an ngam a nih chuan player-ten inrintawkna an neih belh ang tih a chiang a, êng takin hmabak an thlir thei ang. 

Chelsea striker hlui Chris Sutton chuan, "Khawvela hna harsa ber," tih hialin Lampard-a hna chungchang a sawi a, a dikna chen a awm. Blues hian an player ṭha ber Eden Hazard an chan a, hrem vangin an bazar thei lo bawk. 

Klopp pawhin, "He team hi an danglam tawh, tunah chuan Hazard an nei tawh lo," tiin a sawi a, season hmasaa Blues tan goal 21 khunga assist 17 neitu tel loa Chelsea danglamna a hai lo. 

Beiseina

Liverpool leh Chelsea inthlauhna hrilhfiahna awlsam ber chu Mason Mount a ni - English midfielder hi season hmasa khan Derby County-ah loan-in a khel a, player thiam pangngai tak ni mah se Harry Wilson-a'n a hliahkhuh tiin a sawi theih. 

Mount hi Blues match hmasa berah bul ṭantu a ni a, Derby-ah amah hliahkhuhtu Wilson erawh Liverpool-in loan bawkin Bournemouth-ah an chhuahtir a, Reds tana inlan turin a la puitling tawk loah an ngai. 

Liverpool-in tlarhmaah Mohamed Salah, Sadio Mane leh Roberto Firmino an nei a, Lampard erawh Olivier Giroud, Tammy Abraham leh Michy Batshuayi inkara thutlukna siam tur a ni a, Christian Pulisic erawh danglamna thlen thei tura beisei a ni. 

Reds leh Chelsea squad inthlauin lang mah se Lampard hi hun harsaa Chelsea lo khai chhuak ṭhin tawhtu kha a ni a, zaninah beiseina nen Blues fan-ten an thlir ang. 

Inkhel Chhehvel

•Liverpool-in a vawi ruk nan UEFA Super Cup an khel dawn a, an chak chuan vawi li he nomawi an chawina hi a ni nghal ang.

•Chelsea tan UEFA Super Cup-a an vawi li inlanna tur a ni thung a, mahse an inlan hmasak ber 1998-a nomawi an chawi tih loh chu an la champion leh rih lo. 

•UEFA Super Cup-a English club an intawn hmasa ber tur a ni a, a vawi riat nan England-in champion an nei dawn tihna a ni a, Spain (15) leh Italy (9) chiah an phak lo. 

•Premier League club-te Super Cup-a an inlan hnuhnung paliah an tlawm vek a, heng zingah hian vawi hnih Chelsea (2012 &13) an tlawm chu a tel. 

•Kumin hi kum 2013 hnua Spanish club-in UEFA Super Cup-a nomawi an chawi loh hmasak ber 

a ni dawn. 

•UEFA Super Cup hnuhnung pasarihah ram khat club vek an inhmachhawn - Italy (2) leh Spain (5) a ni a, nikum khan Atletico Madrid chuan Real Madrid an hneh. 

•UEFA hnuaia inelnaah Liverpool leh Chelsea hi vawi 10 ngawt an intawng tawh a, London club an chungnung zawk. Team pahnih inhmachhawnna hi Champions League vek a ni a, match ngaah an inhnehtawk. Liverpool hi vawi hnih an chak a, Chelsea hi vawi thum an chak thung. 



Share this Post

Login to comment
No Comments