Kawng a la awm, mahse a zim hle

Andrea Dovizioso chuan MotoGP 2019 champion ni turin beiseina a la neih thu a sawi a, chutihrualin a hmaa awm Marc Marquez hnen aṭanga nomawi chawi tur chuan a awlsam loh tur thu a sawi tel bawk.

Pathianni a tlan zawh tak Austrian Grand Prix-ah Dovizioso hian pole position aṭanga bul ṭantu Marquez hi kawng kawi hnuhnung berah tlan pelin, second 0.213 chauhin a hneh - season kal laia a vawi hnih nan hnehna a chang.

Kuminah intlansiak pariat an la nei dawn a, tun dinhmunah rider championship-a pahnihna Dovizioso hi Marquez aiin point 58 zetin a hniam mek, anni pahnih chauh hian nomawi an inchuh tawh tiin a sawi ngam.

Ducati rider Dovizioso chuan, "Intlansiak hmabak kan la ngah avangin beiseina kan ti tawp tur a ni lo. Vawi khat chetsual leh chetfuh hian danglamna thui takin a siam thei, season hmasa aiin team ṭha zawk kan nih tawh bawk avangin hlawhtling thei kan ni.

"Amaherawhchu, kan elpui Honda hi team ṭha an nih bakah hmahruai mektu Marquez hi vanglai hmang mek a nih avangin tlan pelh an harsa hle. Kawngka zim taka inhawng chu hawn zau ngei kan tum ang," a ti.

Bike intlansiakna sang ber MotoGP hi August 25, Pathianni hian Silverstone-ah British Grand Prix an tlan leh ang.



Share this Post

Login to comment
No Comments