German Cup Bayern Munich an chak

Robert Lewandowski-a'n goal a khung zanah defender Lucas Hernandez chuan Bayern Munich tan a match hmasa ber a khel a, German champion hian fourth division Energie Cottbus chu 3-1 a hnehin German Cup second round an lut.

Thawhṭanni zan Stadion der Freundschaft-a inkhelah Lewandowski chuan minute 32-naah goal hmahruai a khung. Poland international leh Kingsley Coman ten chawlhlawk hmain bar an tih per dawp a, second half-ah Coman-a'n a hun ṭha hlah nawn loin goal hnihna a khung.

Bayern tan Leon Goretzka chuan an goal thumna leh chak nemnghehna a khung leh a, hun tawp dawna Berkan Taz-a penalty chhuih luh chuan mualneitu lam beiseina a tinung phak tawh lo. Kum 1994 hnu lamah Bayern hi German Cup first round-ah an la tla ngai lo.

Inkhel dangah Wolfsburg chuan extra time-ah goal hnih khungin Halle chu 5-3 in an hneh hram a, second division club Karlsruhe leh Stuttgart te pawhin an khingpui Hannover leh Hansa Rostock te hnehin second round an lut ve bawk.



Share this Post

Login to comment
No Comments