US Open singles khel lo tur Andy Murray

Beiseina sang tak nen Andy Murray chuan singles match a khelh ve leh a, a duh leh tum ang result erawh a nei lo. Cincinnati Masters aṭanga a tlak hnuah Briatian tlangval hian US Open-ah singles a khelh loh tur thu a sawi chhuak.

Nimin zing khan Centre Court-ah Murray hian Richard Gasquet a hmachhawn a, January thla hnua singles match a khelh lehna hmasa berah hian 6-4, 6-4 in a chak lo - atan singles khelh a la awlsam lo hle tih a lang chiang.

Singles match

January thlaa khelh zawh tak Australian Open-ah Murray hi a khel bawr na a chhuak leh a, inelna a hmachhawn zawh hnuah zai a ni. Melbourne-ah hian atan Grand Slam hnuhnung ber a ni tawh mai thei tiin a sawi hial.

Mahse, a hliam zai a nih hnuah hmalam a pan ve zel a, grass court season an hman lai khan doubles huangah chuan a inlan ve thei. Wimbledon-ah phei kha chuan mipa doubles leh mixed doubles a khel kawp thei a ni.

Murray hi US Open inbuatsaihna zinga ngaihhlut hlawh Cincinnati Masters-ah a inlan zui a, harstana lian tham nei loin khel zo mah se a chak loh hnuah tun hma lama a dinhmun ang kha a la phak lo tih a pawm.

Dam fel lo?

Richard Gasquet a hneh loh hnuah Andy Murray hi thuthar thehdarhtute chuan US Open singles match khel turin wildcard hmu ta la i pawm ang em? tiin an zawt. Murray chuan, "Tun ṭuma ka inkhelh zawh hnua ka awm dan ang hi chuan best of five set huanga singles khel turin ka la inpeih tawk lo.

"Wildcard hmu pawh ni ila, ka tan chuan lak loh a la fuh zawk ang. Match rei lo te te khelh hnua ka awmdan zirchian hnuah Grand Slam ka khel thei dawn nge dawn lo chu a la hriat chauh ang," a ti. Mipa tennis hi major tournament bikah best of five set an khel a, inelna dangah erawh best of three a ni thung.

Kum 32 mi Murray hian kar leha khelh tur Winston-Salem Open-ah chuan inlan theih a beisei thu a sawi tawh a, Grand Slam khelh zawh hnuah China lamah inelna dang pahnih Zhuhai Championships leh Beijing Open te khelh leh tumin hma a la mek bawk.

Beiseina

Andy Murray hian June thlaa doubles match a khelh leh ṭantirh khan August 26 aṭanga ṭan tur US Open-ah hian singles match khelh theih thut a inbeisei thu a sawi tawh a, tunah chuan a beiseina hi a thleng dawn ta rih lo.

New York-ah hian doubles match chu a khel tho tura ngaih a ni, amaherawhchu tun dinhmuna set thum bak khelh a la zuam lo hian Murray hmalam hun tur chu dinhmun chiang lo takah a dah chhunzawm.

Grand Slam vawi thum champion tawh Murray hi a service chu a la ṭha reng a, mahse a khel bawr vangin court chhunga a che vel ṭhenkhat erawh a khawr deuh. Zaipui (major surgery) vawi hnih a tawh hnuah pawh London Olympic champion hian beiseina nen hmalam hun a thlir mek a ni.

Inkhel dang

Cincinnati Masters inkhel dangah tun hma lama lo champion tawh Marin Cilic pawh beisei phak loin a tla nghal, 2016 champion hi Radu Albot lakah 6-4, 7-6 (8-6) in a tlawm.

Seeded 14-na Cilic hian set hnihna an khelh lai hian set point vawi ruk ngawt a hmu a, mahse Croatian player hian a chhawr ṭangkai thei lo vek. Albot hian a match lehpekah chuan Laslo Djere leh Diego Schwartzman te inkhela chak zawk a hmachhawn leh ang.

Nick Kyrgios pawhin Lorenzo Sonego chu 7-5, 6-4 a hnehin second round a inhlangkai ve bawk. Australian tlangval hi a khel ṭha hle a, a khingpui hi break point a hmuhtir miah lo - aces vawi li siamin seeded pariatna Karen Khachanov a hmachhawn leh dawn a ni.



Share this Post

Login to comment
No Comments