Khawvel defender manto ber Harry Maguire

Manchester United-in tlarhnung thuam chak nan pound maktaduai 80-in Leicester City aṭangin Harry Maguire an lalut a, Pathianni zan khan English defender ho hian Chelsea lakah goal chhuah loin 4-0 in an chak.

Ole Gunnar Solskjaer hote an khel ṭha tlang a, goal li an khung ṭuma man of the match-a an thlan Maguire han belchiang 

teh ang.

Sheffield naupang

Harry Maguire hi Sheffield-ah a piang a, he khuaah hian club pahnih Sheffield Wednesday (The Owls) leh Sheffield United (Blades) a awm. A pa hi Owls fan ni mah se a nu hi Blades ṭantu a ni thung.

Maguire hian kum 10 mi a nihin Sheffield United hi a zawm a, hei vang hian a nu hnungzuiin Blades ṭantu a ni. Kum 2011 khan Sheffield United chu FA Youth Cup final a thlenpui a, Manchester United nen Bramall Lane-a entu 29,977 hmaah 2-2 in an inhnehtawk. Amaherawhchu second leg Old Trafford-a khelhah Man United 4-1 in an chak.

Alex leh Moyes

Sir Alex Ferguson chuan FA Youth Cup final hi enin Man United tana inlan langsar zuite chu Paul Pogba, Jesse Lingard, Michael Keane leh Ravel Morrison te an ni. Final-ah hian Maguire hi an intauh nat deuh avangin Manchester khaw damdawi inah zan khat a riah a ṭul a, United hian duhsak takin an club jersey an pe. Sir Alex pawhin Maguire hi biain a thawhrim phawt chuan 'top level' a khel turin theihna a neih thu a hrilh bawk.

Ferguson thlaktu David Moyes pawhin Maguire hi a enthla zui a, amaherawhchu kum 2013-ah kha chuan United tan chuan mamawh chuang liamah a ngaih thu a sawi chhuak. Moyes chuan, "Everton-ah khan Tim Cahill a ni emaw player dang pawh league hniam zawk aṭanga ṭha taka rawn khel chhuak kha an awm. United ka enkawl pawh khan Harry Maguire hi kan hre ngei a, a khel kan en ṭum pawhin khel ṭha mah se a len bakah a mawng a lian tel a, a la naupang bawk si. United-ah Nemanja Vidic, Rio Ferdinand, Jonny Evans, Michael Keane, Phil Jones leh Chris Smalling te an awm avangin kan mamawh tawh lo," tiin a sawi a, tun dinhmun thleng turin harsatna paltlang a mamawh thu a sawi bawk.

Hull City (2014-2017)

Sheffield United-ah hian Maguire hi Player of the Year a zawnin kum thum a ni a, hetiang zat bawk hi League One - PFA Team of the Year-ah thlan a ni.

Kum 2014 khan Hull City-in pound maktaduai 2.5 in an lalut a, amaherawhchu UEFA Europa League playoff-ah Belgium club Lokeren an hneh lo. Premier League-ah Maguire hi khelhna hun pek a ni lawk lo a, December 20-ah bench aṭangin a lut. January thlaah loan-in Wigan Athletic a zawm a, hemi chhung hian Hull hi Championship-ah an tla.

Hull hian season khat Championship-a an awm hnuin playoff-a Sheffield Wednesday 1-0 a hnehin Premier League-ah an let a, Maguire pawh bench aṭangin a lut. Tuna United assistant manager Mike Phelan hian Hull hi enkawlin Maguire hian hmun pawimawh a chang a, an club hi relegate leh mah se Maguire hi fan leh player-te'n player of the season-ah an thlang.

Leicester City leh England

June 15, 2017-ah Maguire hian pound maktaduai 17-in Leicester City a zawm a, hetah hian hming a chher lehzual. August 24-ah England tana World Cup qualifier khel turin koh a ni a, Three 

Lions-in 2018 World Cup semifinal an thlen khan player pawimawh a ni.

Season liam ta khan Leicester City tan minute zawng zawng a khel kim vek a, players' player of the season a ni a, Jose Mourinho-a'n lak a tum tawh defender hi Manchester United-in an hel thar leh bawk. United manager Ole Gunnar Solskjaer-a'n nipui transfer atana lakluh a tum ber a ni a, Leicester City-in chhiar to deuh mah se chief executive Ed Woodward-a'n Norwegian manager duh hi a tihhlawhtlinsak.

Leicester leh vanneihna

Kum 2016 khan Leicester City-in Premier League nomawi an chawi a, Chelsea-in Foxes aṭangin N'golo Kante lalutin 2017-ah league-ah 

an champion.

Manchester City-in 2018-ah Foxes 

aṭang bawkin Riyad Mahrez an lalut ve leh a, 2019-ah league nomawi an chawi. Manchester United-in 2019-ah Maguire an lalut ve leh ta chiah a, Leicester vanneihna an chhawm chuan nomawi a hnai hle. 

Amaherawhchu 'vanneihna' hi chu tehfung hman tlak a ni lo a, tun season-a Champions League khel pha lo Manchester United hian season thara Europe-a inelna sang ber an khel thei a nih chuan Maguire tan hlawhtlinna a ni phak ang.



Share this Post

Login to comment
No Comments