Sharapova hmaah Barty

Maria Sharapova chuan harsa takin Alison Riske chu 6-3, 7-6(4) a hnehin Cincinnati Masters second round a lut a, Russian nula hian a match lehpekah chuan world number 2 Ashleigh Barty a hmachhawn leh dawn.

Grand Slam vawi nga champion tawh Sharapova leh Riske te hi wildcard hmanga inlan an ni a, tawnhriat ngah leh player ṭha zawk Sharapova-i'n match point a hmuh palina chhawr ṭangkaiin hnehna a chang.

Inkhel dangah world number 1 hlui Caroline Wozniacki erawh tleirawl Dayana Yastremska lakah 6-4, 6-4 in a chak lo, a vawi khat nana Cincinnati Masters kheltu Yastremska-i'n a beisei aia ṭha result a hmu.

Johanna Konta pawhin beisei a phak bik lo, British number 1 hi Rebecca Peterson lakah 6-3, 3-6, 7-5 in a chak lo. US nula Venus Williams erawh Lauren Davis lakah 7-5, 6-2 in a chak thung.



Share this Post

Login to comment
No Comments