Wesley Sneijder-a'n football khelh a chawlhsan

Football mawitu zinga mi Netherlands legend Wesley Sneijder chuan Thawhṭanni khan football khelh a chawlhsan thu a puang.

Kum 35 mi Sneijder hian ram tana khel tam ber record chelhin vawi 134 zet a khel a, 2010 World Cup-ah final thlenpuiin 2014-ah pathumna a nihpui 

leh bawk. 

Sneijder hian an khaw club FC Utrecht hnuaiah hna thar a chelh dawn. Real Madrid leh Inter Milan midfielder hlui Sneijder chuan, "Tunah chuan football khelh ka chawl tawh a, ka thil tawnte sawichhuahna hmun ka duh. Utrecht nena kan inzawmna hi a thuk a ni," tiin a chawlh thu FC Utrecht YouTube channel kaltlangin an sawi.

Tu nge Sneijder?

Wesley Sneijder hi June 9, 1984 khan Utrecht-ah football ngaina chhungkua aṭangin a piang a, a pa leh unau pahnih Jeffrey leh Rodney te chu football khel ṭhin tho an ni.

Khawvela football zirna lar Ajax academy aṭangin a inzir chhuak a, Daley Blind-a pa Danny Blind-a enkawlna hnuaiah a awm. Kum 19 mi lek a nihin Ajax coach Ronald Koeman hnuaiah a khel ṭan a, kum 2007-ah euro maktaduai 27-in Real Madrid a zawm a, hetih hunlai hian Dutch player manto ber pahnih a ni.

Spain leh Italy

Sneijder hian Real Madrid hi La Liga-ah a champion pui a, kum 2009 khan euro maktaduai 15-in Inter Milan a zawm.

Dutch midfielder hian Italian club hi treble champion puiin 2009-10 season-ah Serie A, Coppa Italia leh UEFA Champions League nomawi an chawi vek.

Hun tawp lam

Sneijder hi contract chungchangah Inter nen an inhmuh thiam loh avangin kum 2013 khan Galatasaray a zawm a, hetah hian Super Lig nomawi pahnih bakah Turkish Cup leh Turkish Super Cup-ah vawi thum ve ve a champion pui.

Kum 2017-ah Ligue 1 club Nice zawmin French club-ah sulhnu ṭha a nei lo a, season liam ta khan Qatar club Al-Gharafa a zawm. Hetah hian Qatari Stars Cup-ah an champion.

An liam zel e

Netherlands-in World Cup nomawi chawi lo mah se 2010 leh 2014-ah pahnihna leh pathumna an ni.

2010 WC-a goal nga tehmeuh khungtu Sneijder chuan inkhelh a chawlhsan ta a, kum 36 mi Robin van Persie pawhin May 12, 2019 khan inkhelh chawlhsanin kum 35 mi Arjen Robben pawhin kumin tho khan inkhelh a chawlhsan thu a 

puang bawk.



Share this Post

Login to comment
No Comments