Van Dijk-a'n Adrian a ring tawk

Liverpool-in Premier League-a an match hmasa berah 4-1 in Norwich City sawp mah se hliam vangin goalkeeper chhuanvawr Alisson lakchhuah a ngai a, UEFA Super Cup-ah second choice goalkeeper Adrian inlan a ṭul dawn. 

Adrian hian Norwich lakah hian Alisson hi thlakin a inlan a, a khel chhe lo. Liverpool lamin Alisson chawlh hun chhung tur la puangzar lo mah se Super Cup a khelh loh tur thu erawh a tirah sawichian nghal a ni. 

Simon Mignolet thlak tura lakluh Adrian hian tawnhriat ngah tawh mah se West Ham-a a hun tawp lamah khelhna hmun a chang tam lo a, season hmasa khan cup competition-ah chiah inlanin match nga a khel. 

Mahse, Reds defender chhuanvawr Virgil van Dijk chuan an goalkeeper hi an rintawk thu sawiin, "Adrian hi a kum zat ka ngaihtuah a, a career ka thlir tel bawk a, kan team tana inlan turin harsatna a nei lo ang," a ti. 

Dutch defender chuan sawi zawmin, "Premier League-a a tawnhriat ringawt pawh a tam tham em em a, a game pangngai a khelh phawt chuan kan tan ṭha takin a khel ang," a ti a, Hammers tana vawi 150 inlan thei goalkeeper a ringtawk. 

Champions League leh Europa League nomawi chawi ten an inchuh ṭhin UEFA Super Cup hi Nilaini zan dar 12:30-ah khelh a ni dawn a, Reds hi Europa League champion Chelsea nen an inkhel ang. 



Share this Post

Login to comment
No Comments