Nadal-a'n nomawi a humhim

Rafael Nadal chuan player ṭha chungchuang bik a nihzia lantir nan Rogers Cup title a kawl lai chu a humhim a, final-a a khingpui Daniil Medvedev chu harsa lo takin a hneh.

Pathianni zana final khelhah Grand Slam vawi 18 champion tawh Nadal hian darkar khat leh minute 10 chhung lekin Russian tlangval hi 6-3, 6-0 in a sawp a, Montreal-ah hian vawi nga a champion tlinna a ni nghal.

Spanish tlangval Nadal-a'n tennis a khelh hun chhungin Masters 1000 title ringawt pawh 35 zet a la tling tawh, tun ṭum hi clay court ni lo court danga nomawi a kawl lai a humhim hmasak ber a ni thung.

Kum 33 mi Nadal chuan, "Tun tournament bika ka khelh ṭhat ber ni ka tawng a, final a lo nih chiah bawk avangin ka vanneih phah a ni. Season tawp hmain hard court inelna khelh tur kan la nei nual a, tuna result ṭha nei chunga nomawi chawi theih hi a lawmawm hle," a ti.

Seeded pariatna Medvedev hian set hmasa zawk an khelh laiin break point a hmuh a chhawr ṭangkai lo a, a service a hloh zui avangin 3-1 in a hnufual - a hnu lamah erawh tawnhriat ngah leh player ṭha zawk Nadal-a'n hun ṭha a siamsak tawh lo.



Share this Post

Login to comment
No Comments