AIFF-in hmeichhe coach a zawng

All India Football Federation (AIFF) chu nakkuma FIFA Women’s Under-17 World Cup a thlen tur atan a inbuatsaih zel a, India hmeichhe U17 enkawl thei tur ram pawn lam mi coach a zawng ṭan. 

AIFF national team director Abhishek Yadav chuan, "Advertisement chhuahin coach zawn hna hi kan ṭan a, kan beisei ang tak hi kan hmuh theih kan beisei," a ti. 

India hian thla tharah chuan coach thar hi neih theih an inbeisei a, professional football-a kum riat tal hun hmang 

tawh an duh bawk. 

Hetihlai hian fitness leh goalkeeping coach chu India hian a zawng mek bawk. Yadav chuan, "Head coach atan chuan hmeichhia ni thei hram se kan duh a ni," a ti a, hmeichhia ni kher lo coach ṭha tak an hmuh chuan an pawm tho tur thu erawh a sawi lang. 

FIFA U17 Women's World Cup hi September 21 aṭanga October 4 thleng neih tur a ni a, ram 16-in India-ah inelna hi an hmachhawn ang. 



Share this Post

Login to comment
No Comments