Neymar tel lohna PSG an chak

French champion Paris St-Germain-in Ligue 1 a an match hmasa berah chhuak tur anga sawi Neymar chu squad-ah an telh lo a, an mikhual Nimes chu harsatna nei loin 3-0 in an hneh. 

PSG tan striker Edinson Cavani chuan penalty hmangin goal hmahruai a khung a, Kylian Mbappe chuan second half-ah rawn thawh belhin Angel di Maria khung tur a siamsak bawk. 

Paris club-in Neymar tel lo pawhin goal khung an harsat lo tih a lang a, club sporting director Leonardo-a'n chhuah lam hnaih tawh nia a sawi Neymar hian chhuah a hnaih tak tak ta niin a lang. 

PSG hian season hmasa khan point 16-a sang fal chungin league nomawi an lo chawi tawh a, a zawna a vawi thum nana champion turin kawng dik an zawh mek. 

Mangṭha Neymar?

PSG inkhelh zanah fan-ten Neymar boruak an hne tih an pholang a, "Neymar kal bo rawh," tih banner lian tak chu Parc des Princes khelmualah hmuh turin a awm a, ṭawngkam mawi lo tak taka an tih elna banner a awm nual bawk. 

Mahse, PSG boss Thomas Tuchel ngaihdan a dang thung. German coach chuan, "Neymar hi kan chan a nih chuan zan ka mu thei lo hial ang. Ani ang player chan a, a hmun ruak luah khat thei tur zawn chu a hautak dawn em a ni," a ti. 

Tuchel chuan sawi zawmin, "Neymar hi kan hnena cham tura hmin ka tum a, mahse a mimal duhthlanna erawh ka zah sak ang. Engkim hi amah leh club inkar a ni tawh," a ti a, thutawp siam tur a nih loh thu a sawi. 

Mbappe pawhin a ṭhianpa chungchang sawiin, "Neymar telna leh tel lohna chu a in ang thei lo. Mahse, a awm ta lo a nih pawhin theihtawp kan chhuah chhunzawm zel ang," a ti. 

Barcelona hi...

Neymar kir lehna tura an sawi rin ber chu Barcelona a ni a, mahse khawthlang media lam tarlan danin Catalan club hian PSG chu indawrpui harsa an ti rih hle!

Barcelona khawpui chanchinbu Sport-in an tarlan danin French club hian pawisa bakah Barcelona player pathum pek tel an ngiat a, Catalan club lamin 'lutuk' niah an ngai. 

Mahse, Barca hian chawlh erawh an tum lo. PSG nen hian inbiakna an la kalpui reng a, Neymar pawh a mimal takin an la dawr reng - Brazilian forward duhthlanna hi a pawimawh dawn tihna a ni. 

Spanish champion tan match 186-a inlana goal 105 khungtu Neymar hi Barcelona-ah a kir a nih chuan nghawng erawh a nei nghal dawn a, Philippe Coutinho chanchin a ngaihnawm tel nghal ang. 

Real an lo lang

Madrid khawpui chanchinbute titi tui ber chu Neymar leh Real Madrid a ni leh der tawh a, mahse Barcelona 'ngainatu' a nih avangin fans tam takin Neymar hi an duh lo niin an sawi. 

Hetihrual hian Real-in transfer bazar-ah sum an seng hnem tawh a, Neymar lalut tur hian pawisa an la nei meuh ang em, tih chu zawhna awm mek a ni. 

Neymar hian PSG-ah hian chhiah chawi vek hnuin kum khatah pound maktaduai 33 vel a hlawh mek a, Real hian a chhiah chawi tur nen chuan kum khatah pound maktaduai 66 an sen a ngai dawn.

Hei mai hi a la ni lo cheu - a man zat hi pound maktaduai 169 a ni a, PSG hian player an beisei tel cheu bawk ang - Barca tan ai mahin Real tan hian a harsa niin a lang. 

Hello Dybala 

Neymar boruak kara lo lang tel chu Paulo Dybala a ni. Khawthlang media-te tarlan dan chuan  PSG sporting director Leonardo chuan Dybala hi phone-in a bia a, Neymar thlak tura PSG zawm turin a sawm!

Argentine forward hian Premier League transfer tawp hma khan Manchester United leh Tottenham Hotspur zawm hman ṭep mah se a man a to bakah hlawh a phut hnem avangin club pahnihin an inrempui thei lo. 

PSG hian Dybala hi kum khata pound maktaduai 11.1 hlawh tir an inhuam a, kum nga chhung contract ziahpui an duh bawk - Neymar an hralh chuan a man zat tur pound maktaduai 80 bawr velah pawh harsatna an nei lo ang. 

Mahse, Juventus hian Dybala hi an chhuah a nih chuan a thlakna tur an duh a rinawm a, August 18 thleng Serie A transfer-a inhawng a, Ligue 1 lam hi August 31 thleng an bazar thei thung. 



Share this Post

Login to comment
No Comments