Arsenal chakna Auba goal khat

Pierre-Emerick Aubameyang-a goal khat hmangin Arsenal chuan Newcastle United 1-0 in an luhchhuah a, Unai Emery nauten season hmasa chak lo chunga bul an ṭanna ang kha an thai chhia.

Newcastle manager thar Steve Bruce-a'n point hmuh phu takin a naute khelh chhuahtir mah se tihsual vawi khat neih a pawizia an zir chhuak thung. 

Auba goal khat

St James' Park-a inkhelah Arsenal lamin ball chang tam mah se a hmawr an bawk fuh thei lo a, hun chanve hma lamin Aubameyang-a'n hun ṭha neiin hnai tak aṭangin goal zawnah pet mah se Newcastle keeper Martin Dubravka-a'n a dansak.

Second half-ah Newcastle defender Jamaal Lascelles-a'n fimkhur lo taka a ball pet chhuah chu Ainsley Maitland-Niles chuan lo dawng fuhin box chhunga vengtu nei lo Auba a pe nghal. Season hmasaa league goal 22 khungtu Gabon striker hian tihsual nei miah loin chakna goal khung nan a hmang.

Magpies hian ball chang tlem mah se goal hmaah an hlauhawm zawk. An player manto ber Brazilian forward Joelinton-a'n a petna tur khawp a insiam hnuah goal-ah a pet a, Gunners keeper Bernd Leno-a'n a dansak. Newcastle  midfielder Jonjo Shelvey volley ṭha zet chuan goal ban a per bawk.

Hmel thar

Unai Emery-a'n pound maktaduai 125 vel sengin nipui bazar hun laiin a squad a thuam chak a, an match hmasa berah erawh player thar zingah inkhel bulṭan an awm lo. Misual beih tawk Mesut Ozil leh Sead Kolasinac te chuan hliam nei lo mah se team zingah an la 

tel lo bawk.

Gunners player manto ber Nicolas Pepe (£72m) leh Real Madrid aṭanga an hawh midfielder Dani Ceballos te chu bench aṭanga luhtir an ni a, inkhel boruak siam danglam tur khawp chuan an la che na nghal lo. Bazar tawp nia lakluh David Luiz erawh bench lamah 

ṭhut tluantir a ni thung.

Spanish manager Emery chuan, "Luiz hi a fit ṭha, mahse pre season kha team dang tan a nei a, kan tana khel tur chuan hun a la mamawh. Pepe pawh fit lehzual zawka a awm phawt a ngai. Ceballos pawh kan hnenah rawn kal hma deuh mah se hliam tenau a neih avangin minute 90 khel turin a la inpeih lo," tiin a player thar pathum dinhmun a sawifiah.

London club hian August 17-ah Burnley an hmachhawn ang a, chumi zawh chuan Liverpool (Aug 24) nen Anfield-ah an inkhel ang.



Share this Post

Login to comment
No Comments